Голосник

Санкова і Нижня Полянка в спільным проєкті, а на фоні Велика Война

Ґміна Санкова вєдно з партнером – русиньском Нижньом Полянком, реалізуют проєкт, в рамках котрого м.ін. зробили выставы, одтворили окопы і становиска до стріляня, вказали інсценізациі двох найважнійшых подій І світовой войны на польско-словацкым пограничы. Были то реконструкциі «Битвы під Ґорлицями» (Санкова) та «Битвы о верх Каштелик» (Нижня Полянка). В плянах є іщы выремонтувати воєнны цмонтері та зреалізувати історичный парк в Санковій.

На проєкт «Знана і незнана істория – памяткы І світовой войны польско-словацкого погранича» ґміны Санкова і Нижня Полянка здобыли 63 тис. евро. Векшу част задач уж зреалізували в минулых роках. Остало зорґанізувати історичный парк та одремонтувати цмонтері.

Макєта 3Д, різбы жолнірів, сенсоричнa стежкa

Історичный парк злокалізуваный буде на дост великій обшыри зараз під палацом Длуґошів в Санковій, напроти мотузкового парку, котрый фунґує над Санківком в Сярах. Хотят перемінити луку, котра тепер гын є, в місце, якє буде підкрисляло історичный характер той обшыри – факт, што през Санкову ішол фронт І світовой войны.

В парку буде находила ся альтана, але не лем така, жебы си в ней присісти і одпочати. Буде гын поміщена макєта 3Д цілой ґміны, на котрій будут позначены локалізациі вшыткых воєнных цмонтерів з Великой Войны.

Центром парку буде пляц з ґабіоновыма сіджынями (метальовы кліткы выполнены каменьом). Гын тіж зааранжуваный буде воєнный окоп з балів і лозины. В парку поставлят різбы жолнірів І світовой войны і солярный зыґар.

В дальшій альтані поміщене буде музичне ґратя. Ціліст дополнит сенсорична стежка, камінна лавка, одповіднє освітліня, елементы малой архітектуры, інформацийны таблиці. Буде тіж біциґльова стежка як доізд до парку. Ціліст робіт то кошт 7 млн зл.

Чорне, Бортне, Ропиця і інчы

То не вшытко, бо проєкт «Знана і незнана істория – памяткы І світовой войны польско-словацкого погранича» обнимат ревальоризацию воєнных цмонтерів. На обшыри ґміны Санкова одновлят дванадцет цмонтерів, а по словацкій страні, в околици Нижньой Полянкы – штырнадцет.

В примірі ґміны Санкова выремонтуют: цмонтері но 53 в Чорным, но 64 в Борнтым, но 67, 68, 77 та 78 в Ропици, но 70 в Рыхвалді, но 79 і 80 в Санковій, но 81 і 82 в Мацині Великій та но 83 в Вапенным.

Проєкт обнимат тіж зрыхтуваня выставы присвяченой цмонтерям з часів І світовой войны. Будут запрезентуваны портреты артистів і архітектів воєнных гробів, помершых жолнірів, істория цмонтерів по розпаді австро-угорской монархіі, найцікавшы сохранены цмонтері Західньой Ґалициі.

Нижня Полянка і парохія в Санковій

Не лем з ґміном Санкова партнерує Нижня Полянка. Так само партнером в рамках Інтерреґ Польща-Словация є Нижня Полянка для парохіі св. Осифа в Санковій. Є то проєкт «Деревяна архітектура – памятковы скарбы погранича». До кінця 2021 рока плянуют зревіталізувати парк і поставити макєту костела в Нижній Полянці та зробити ілюмінацию памятникового костела свв. Филипа і Якова в Санковій.

Фот. sekowa.pl

Шеруй.

О авторі

Наталія Малецка-Новак

Хоц по школі інжынєр, то не тыкат ся роботы по тзв. фаху ;) Зато уж од вельо років доносит о вшыткым, што ся діє на Лемковині. І не лем. Штоденньо од 11.00 год. веде lifestyle'овый проґрам «Пачісна година» , а в суботы о 9.00 год. чытат для Вас порталь. Контакт: natalia@lem.fm

Коментарі