Село Чірч хоче векшу капаціту школы. Будовати буде сельска фірма

В селі Чірч, Старолюбовняньского окресу, хотять на звекшіня капаціты основной школы з матерьсков школов здобыти средства з плану обновы.

Як інформовав аґентуру TASR староста села Михал Дідик, самосправа недавно підписала контракт із зготовительом ставебных робот, а єдночасно рихтує публічне обстараваня на додавателя выбавліня школы.

Звекшыть ся капаціта о 100 процент

„Покля будеме зо жадостьов успішны, пак з будованьом бы сьме хотіли зачати в слідуючім році. Но іщі передтым хочеме мати приготовлены вшыткы потрібны діла,“ повів староста.

На надбудованя і прибудованя новых просторів має подля публікованого контракту іти веце як 920 тісяч евр. Кілько піде на выбавліня учебных клас, буде подля старосты ясне по публічнім конкурзі, аж пак подають жадость о дотацію.

Школярі другого ступеня в селі Чірч мусять того часу ходити до сел околіці, кажде рано ходить автобус повный дітей наприклад до 10 кілометрів оддаленого Орлова. Вдяка розбудованю школы выникне вісем клас, і далшы шпеціалны учебны класы, а капаціта школы бы ся мала звекшыти о 100 процент.

Чірч бы так мав такзвану повно орґанізовану школу, значіть мав бы першый і другый ступень основной школы.

Перерабляли уж в минулости

Основна школа в русиньскім селі Чірч уж в минулости перешла частковов реконштрукційов, котра помогла ку шпоріню енерґій. Вдяка дотації в сумі 320 тісяч евр так само самосправа перед штирьома роками зреконштруовала а розшырила і матерьску школу.

Но кількость жытелів в селі безперерывно росне, за остатніх десять років там прибыло понад 200 обывателів. Староста то приписує головно будованю новых арендованых сельскых квартелів, будованю локаліт на будованя родинных домів і потрібной інфраштруктуры.

Робити буде сельска фірма

Зготовительом робот на розбудованю школы буде сельска фірма Солиско Чірч. Актуално в ній самосправа давать роботу 15-ом людям, староста думать, же кількость робітників той фірмы так само буде звекшыть ся.

За його словами мають в плані будовати далшы два домы з кавртелями з фінанцій Державного фонду розвитку бываня. Покля буде село успішне і в тім проєкті, фірма подля старосты уж не буде мати доста робітників.

Проєкт соціалного поднику в селі фунфує штири рокы. За тот період подарило ся селу збудовати дакілько домів, матерьску школу, комунітный центер, але фірма Солиско Чірч робила і ходникы, драгы ці каналізацію.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА