Сербска міністерка Чоміч навщівила Націоналный совіт Русинів

В пятніцю 26-го фебруара 2021-го року сербска міністерка про людьскы права, права меншын і соціалный діалоґ, Ґордана Чоміч, вєдно із своїма співпрацовниками, меджі котрыма была і державный секретарь резорту Олена Папуґа, навщівила централу Націоналного совіту Русинів в Руськім Керестурі.

О нащіві міністеркы інформовав портал Радіо-Телевізія Войводины. Чоміч моментално навщівлює совіты окремых меншын, котры жыють в Сербії.

На робочій стрічі председове одборів про інформованя, културу, освіту і урядне вжываня языка і писма на чолі з председом Націоналного совіту Русинів Бориславом Сакачом споминали актуалны проблемы, з котрыма ся стрічають при своїй роботі. Говорило ся і о демоґрафічній а економічній сітуації в Сербії.

Як єден із способів вырішіня проблем міністерка Чоміч підкреслила соціалный діалоґ. Спомянула і важность списованя жытелів, котре і в Сербії має проходити в тім році. Додала, же ку списованю треба приступати без страху, формуларі будуть безпечны і русиньскый язык буде єдным із 13-ох урядных языків, в котрых буде списованя проходити. Ґордана Чоміч акцентовала, же списованя є важным, бо од його резултатів буде залежати політіка в слідуючіх десятьох роках.

Навщіва міністеркы Чоміч в Націоналнім совіті Русинів была реалізована в рамках пожадавкы членів Коордінації націоналных совітів, котра была высловлена на першій сполочній стрічі із представителями новоформованого Міністерства про людьскы права, права меншын і соціалный діалоґ в новембрі попереднього року.

Жрідло фотоґрафії: Рутенпрес.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА