Голосник

Сезонным автобусом через Вышній Земплін з припоїньом з Польщі

Пряшівскый край буде знова веце доступный загранічным і домашнім навщівникам. Крайска орґанізація турістічного руху Северовыход Словакії в співпраці з партнерами приготовила на цілу літню сезону автобус, котрый буде ходити меджі Меджілабірцями і Свідником.

Автобус буде ходити все в пятніцю, суботу і неділю в терміні од 3-го юла до 6-го септембра 2020-го року.  

Сезонный автобус прямо надвязує на влак із напряму Санок – Лупків – Меджілабірці, котрый забезпечують словацькы желізніці. Такым способом і навщівници з Польщі можуть почас того літа ліпше спознати історію, уменя, културу і архітектуру северовыходной Словакії, де жыє найвеце русиньского населіня в рамках Словацькой републікы.

Почас путованя автобусом будуть ся навщівльовати унікатны памяткы Пряшівского краю, котрый є знамый своїм културным богатством.

„В реґіоні находить ся множество деревяных храмів, веце з них є записаных меджі памяткы UNESCO. Подорожны турістічным автобусом почас єдной трасы навщівлять Музей модерного уменя Енді Варгола в Меджілабірцях, Монастырь в Краснім Броді, веце деревяных храмів, але наприклад і Воєньскый історічный музей у Свіднику. Пропозіцію заставок сьме приготовили так, жебы была інтересна і про домашніх турістів,“ пояснив выконный директор Крайской орґанізації турістічного руху Северовыход Словакії Мартін Яношко.

Загранічны навщівници можуть так само схосновати можливости переночованя в локаліті Свідника, де є про них приготовленый дводньовый, респектівно тридньовый продукт турістічного руху.

Турістічный автобус буде ходити з Меджілаборець в споминаны дні о 10.35 год. і прийде до Свідника о 16.26 год. Ціле путованя выйде на три евра за особу. Пряшівскый самосправный край так само забезпечів транспорт турістів із Свідника назад до Меджілаборець так, жебы могли стигнути влак Меджілабірці – Лупків – Санок, котрый одходить з Меджілаборець о 17.48 год.

Жрідло фотоґрафії: severovychod.sk.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

Шеруй.

О авторі

Петро Медвідь

Народженый в центрі Пряшівской Руси, в місті Пряшів. Локалпатріот. Актуалну тему з його точкы погляду мож чути каждый четверь в проґрамі Вступне до контроли о 18.10 год. Каждый робочій день од 8.00 год. мож слухати його Корзо, в котрім вас возьме до світа актуалной політікы. Контакт: petro@lem.fm

Коментарі