Шанса (холем) про реґіон

Пару днів тому были публікованы на Словакії резултаты баданя публічного мніня, в котрім ся респондентів звідали: „Якый є ваш погляд, має або не має стати Україна в будучности членьсков країнов Европской унії?“ Резултаты про Київ не суть позітівны.

Із резултатів выходить, же аж 64 процент гражданів Словацькой републікы є проти того, жебы Україна стала членом Унії. 29 процент было за, 7 процент респондентів не знало одповісти.

Інтересным фактом є, же то не суть лем воличі найвекшой владной партії Smer-SD, котры суть проти вступу. Самособов, председа влады і партії Роберт Фіцо на єднім боці декларує, же він підтримує вступ Україны до европского блоку, на другім боці має ясну протиукраїньску реторіку при каждій принагоді. А то ся вказало і на тім, же аж 89 процент його воличів є проти. Высокы процента проти были і у воличів далшых двох владных партій, а найвеце, аж 95 процент проти проти былo воличіv фашістічного руху Republika.

Лемже і воличі такых хрістіаньскых демократів із KDH або лібералів із SaS то мають в підпорі і неподпорі так пів на пів. Найвекшу підпору, 67 процент, мала Україна лем у воличів найвекшого опозічного субєкту Progresívne Slovensko, а пак у воличів мімопарламентной партії Demokrati.

Лемже кедь ся посмотриме на резултаты подобных бадань в Мадярьску, Чеській републіці або Польщі, они не суть аж так іншы.

Докінця в порівнаню із Мадярьском можеме повісти, же якыйсь історічный отпечаток в думаню людей як наслідство Угорьска існує доднесь. В подобнім баданю Бадательского інштітуту Nézőpont із мая минувшого року было 67 процент мадярьскых гражданів проти вступу Україны до Евроіпской унії, і лем 23 за. Значіть, чісла барз подобны резултатам словацького баданя.

Резултаты цілоевропского баданя із фебруара того року вказують, же 38 процент гражданів Чеськой републікы є за вступ, і 42 процент было проти вступу Україны до Унії. За резултатами польского баданя із юна 2025-го року 35 процент польскых гражданів думать, же їх країна бы мала підтримовати вступ Україны до Унії, 42 процент было проти.

Фактом є і то, же про Русинів Европска унія є найліпшым місцьом про жывот, бо в просторі без граніць можеме наперек тому, же жыєме в дакілько державах, быти вєдно і співпрацовати.

Вшыткы тоты резултаты вказують на факт, же і кедь середньоевропскы країны, самособов подля того, яка влада моментално рядить, веце або менше підтримують Україну што до їй боротьбы проти російского аґресора, із підпоров вступу до Унії то таке ружове меджі гражданами не є. Існує просто якась барьєра, котра нас із Українов ділить.

Тота барьєра може выходити окрем іншого із того, же просто історія нашых країн і історія Україны суть іншы берегы. І то є факт.

Фактом є і то, же про Русинів Европска унія є найліпшым місцьом про жывот, бо в просторі без граніць можеме наперек тому, же жыєме в дакілько державах, быти вєдно і співпрацовати. А не было бы нич ліпше, як кедь бы і Підкарпатя могло быти в тім просторі, і нашы Русины із Підкарпатя, котрых є найвеце, мали бы такы самы можности, якы уж маєме мы теперь.

Зато русиньскый рух все підтримовав інтеґрацію Україны, но з тым условієм, же Україна не може іти до Унії без вызнаня Русинів.

Но теперь ся вказує, же гражданы середньоевропскых країн аж так не підтримують вступ Україны до Унії, а кебы днесь в єдній із споминаных держав зробив ся референдум, якбач бы Київ зістав заблокованый. Што бы, самособов, была шкода і про нашых підкарпатьскых Русинів.

Лемже вшыткы тоты резултаты дотуляють ся звіданя, ці люди підтримують вступ Україны. А што кебы сьме змінили вопрос?

Якы бы были одповіді Мадярів – із оглядом на їх мадярьску меншыну на Підкарпатю, носталіґічных Чехів, котры споминуають на „свою“ Підкарпатьску Русь, але може і Словакіїв, кебы сьме ся позвідали, ці бы привітали, кебы Підкарпатя было даякым способом асоціоване із Унійов?

Резултаты такого баданя бы молги быти цалком іншы. І перед тым, як хтось автора коментаря буде обвиньовати із сепаратізму, звертам увагу, же тото не є цільом.

На світі уж існує прецеденс. Северна Ірландія по брексіті далше рядить ся правилами Унії про транспорт товарів, не має тверду граніцю із Ірландійов, а приступ має і на рынок Унії і Великобрітанії. Є то унікатный реґіон, котрый є стопроцентнов теріторійов Великобрітанії, но так само є в дакотрых ділах якбы „член Унії“. А тота позіція Северной Ірландії має свої історічны причіны.

Історічны причіны на то має і Підкаратя. І в сітуації, коли сусіды не аж так цалком видять Україну в Унії, бы могла быти форма подобного статусу про Підкарпатя шансов холем про реґіон, а вдяка тому може пак і про цілу державу. Но на то бы мусила быти, самособов, і воля з боку Києва.

Статя была написана як коментарь „Вступне до контроли“ лемківского радія lem.fm. Жрідло фотоґрафії: Pixabay.com.