Шарішскый Щавник хоче так само свою сельску фірму

Властну выробну фірму хоче в 2022-ім році засновати русиньске село Шарішскый Щавник в окресі Свідник. Окрім того планує ревіталізацію публічных вонкашніх просторів. Аґентуру TASR о тім інформовав староста Шарішского Щавника Михал Кімак.

Найвекшов вызвов є про село в 2022-ім році основаня фірмы Сельскый подник Шарішскый Щавник. По зряджіню фірмы мають в селі інтерес о то, жебы дістати од державы статус соціалного поднику.

„Сельскый подник буде заміряный головно на зряджіня сельского склепу з потравинами – фрышне освіжіня при дразі першой класы, і выробу потравинарьскых выробків,“ повів староста Кімак.

Як малому селу бы їм в Шарішскім Щавнику подля старосты помогло, кебы была з боку Міністерства фінанцій Словацькой републікы  выголошена вызва заміряна на капіталовы вытраты або звычайны вытраты, котра є од 2020-го року позаставлена.

В селі мають свої планы, але і проблемы, котры хоче староста рішыти. Даны вказують, же ся знижує і чісло жытелів Шарішского Щавника. „Село має того часу 261 обывателів, што є о 31 менше жытелів як в році 2014, коли єм быв выбратый за старосту,“ додав Кімак.

Якраз зряджованя сельскых подників, котры можуть помочі при розвитку села, але і при творіню робочіх місць, може до села назад притягнути і молодых людей. Сельскы фірмы зато намагать ся в остатніх роках зрядити і тримати в ході веце сел.

Добрым прикладом є русиньске село Чірч в окресі Стара Любовня. Їх сельскый подник Солиско Чірч давать роботу домашнім обывателям, многым такым, котры были довгодобо безробітны.

Навеце фірма, котра має так само статус соціалного поднику, од 2019-го року збудовала матерьску школу, зреконштруовала деревяну хыжу, в котрій зробили памятну – музейну ізбу, будує новы сельскы квартелі, а планує і будованя кемпу, котрый бы мав помочі при розвитку турізму.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА