Шлезскій европосол Лукаш Когут засідат в президиі Европейского Парляменту. Буде занимал ся справами меншын

В віторок 23. липця/юлия прошло інавґурацийне засіданя підкомісиі прав чловека (DROI) в Европарляменті. Шлезак Лукаш Когут з Громадяньской Коаліциі был выбраный віцеведучым той комісиі.

Европосол Когут ствердил, же тота комісия є важна з польской перспективы, бо позвалят бороти ся о люди, котры для свободы, рівности і демокрациі готовы сут на найвекшы посвячыня. «В першій черзі займу ся справом Андея Пачобута, безправні вязненого режімом Лукашенкы. То єдна з тем, котром буду ся занимал в надходячій каденциі Европейского Парляменту» – задеклярувал.

«Мойом рольом буде підперти переказ, же так по правді найвекшым проблемом тепер в Европі є тото, што діє ся на сході континенту. Бо то є найближе нас» – повіл Когут.

Шлезакы і Кашебы етнічныма меншынами

Европарляментариста, котрый сам є Шлезаком і од років боре ся о узнаня свойой меншыны, заповідат же «ślonsko godka» мусит быти реґіональным языком. «В теперішній каденциі Европейского Парляменту єм в трьох комісиях: прав чловека, престіжній AFET – заграничных справ та культуры і едукациі, в котрій робил єм уж через пят послідніх років. Певністю на форум той послідньой буду бесідувал о тзв. шлезскій справі. Бо тота комісия занимат ся тіж справами етнічных меншын» – бесідує Лукаш Когут. Як раз на форум той комісиі европосол заберал уж голос о шлезскых проблемах в просторі Европейского Парляменту.

Додає, же на польскым ґрунті треба ждати на зміну президента – на такого, котрый розуміє Шлеск. «Были сме уж близко узнаня шлезского языка за реґіональный, але президент не підписал той зміны в законі. Продолжаня діянь для шлезской справы буде мойом головном задачом на черговых пят років в Европарляменті!» – заповідат.

«Шлезакы і Кашебы повинны быти узнаны за етнічны меншыны, бо то натуральне наслідство Повселюдных Списпів і фактичного стану. Будеме зберати підписы під громадяньскым проєктом, будут то координувати» – бесідує.

Роботы підкомісиі

Як заступця ведучого підкомисиі Когут буде вюл обрадуваня, передавал голос поєдным особам, спілрішал про тото, якыма квестиями буде занимала ся підкомісия.

Три важны для европосла Когута справы для Шлеска то: пересунути выдаткуваня ДПО о два рокы до кінця 2028 рока, охорона етнічных і языковых меншын на рівни Европейской Уніі, в тым «шлезска справа» і узнаня шлезского языка та господарча трансформация реґіону з пошануваньом вынеґоциюваных рішынь з соспільном страном. «По стрічы з Урсульом ван дер Леєн єм спокійный. Даме раду» – підсумовує Когут.

Фот. europarl.eu