Штефан Штец і його турне

Ярю 2018 р. Штефан Штец выдал свій дебютантскій альбом. Премєра проходила в маю. Тепер співак хоче вєдно з гудаками з ансамблю Горнад піти з концертами промуючыма русиньскє цедечко. Штец одвидит Пряшів, Лученец і Братиславу.

Солиста своє турне назвал од слів лемківской еміґрацийной співанкы Полетіл бы-м на край світа. Вельократно в бесіді з нашом редакцийом Штефан Штец зазначал, што нону пісню почул перед роками в Празі, де выступувала Юлия Дошна. Такій сам наголовок носит і дебютантска платня. Думка на еміґрацийны мотивы зродила ся уж вчас участи в популярным шов «Земля Співат». Причынком ґу тому были і його коріня з Лемковины.

Перший з концертів одбуде ся 6. листопада/новембра тр. в Пряшові. 10 листопада/новембра Штец вєдно з капельом Горнад выступит в місті Лученец. Турне завершыт ся 15. листопада/новембра концертом в столичным місті Братислава. Специяльным гостьом буде Любиця Чековска, композиторка, з котром автор выступувал в спомянутым телевізийным шов. При акомпаніяменті Чековской Штец награл єдну з двох версий пісні Полетіл бы-м на край світа, якы находят ся на промуваным фурт цедечку.

То не єдиний проєкт артисты. Штефан Штец просит і на свій авторскій проґрам Справы, што ся діют – більше о ним чытайте гев.