Што дале з высылачами радия ЛЕМ.фм?

Одповід на наголовкове звіданя по части залежыт і од Вас – дорогы радийослухачы. Будеме барз вдячны, кєд рішыте передати 1,5% свого податку, жебы помочы нам сфінансувати утриманя в 2024 році обох высылачів.

Рідко звертаме ся до Вас з прошыньом, але пришол такій момент, же… стоіме під стіном. Як знате, наша діяльніст і функцийонуваня є залежне од міністерияльной дотациі (Міністра Внутрішніх Справ і Адміністрациі) – без ней нияк бы нас не было.

Єднак шаліюча в посліднім часі інфляция спричынила, што не сме в силі утримати оба высылачы лем з реченой дотациі і видима є загроза вылучыня єдного з них (в Польковицях або в Ґорлицях).

Утриманя іх то барз великій кошт (вырівнуючы фактуры за даный рік од ріжных необхідных услугодавців приходят все в наступным календарьовым році, уж по розрахуваню ся з дотациі і фінансовым запертю рока), а додатково в ближучым часі жде на нас іщы єден несподіваный і нияк неплянуваный кошт (на разі ани не знаме, кілько вынесе) – в звязку з выбуріньом комина в Польковицях, мусиме найти нове місце для высылача в тамтій обшыри.

Очывидно, што фурт глядаме можливости додаткового фінансуваня функцийонуваня радия і порталю – такым успіхом є в остатнім часі підпертя од Ґміны Польковиці, за котре сме барз вдячны, але є то, на жаль, фурт мало.

1,5% податку на высылачы радия ЛЕМ.фм

Жебы безпосередньо Вас не обтяжати, хочеме запропонувати Вам популярну форму підтримкы – через переданя при найблизшым розрахуваню 1,5% свого податку для выбраной орґанізациі публичного хосну. Як помочы безпосередньо нам?

В деклярациі PIT впиште номер KRS Стоваришыня Польскых Музиків Камералистів (Stowarzyszenie Polskich Muzyków Kameralistów) 0000517330, з дописком в рубриці дрібницьовый ціль: LEM.fm.

Рекляма в ЛЕМ.фм

Не хочеме нич за дармо – можеме заоферувати Вам тіж можніст зареклямувати ся на антені нашого радия.

Можете зареклямувати себе, свій бізнес або свою діяльніст. Ґарантуєме атракцийны ціны і дотертя до чысленной ґрупы слухачів. Кєд мате готовый материял – пришлийте го нам, кєд не мате – поможеме го зредаґувати і змонтувати. Сконтактуйте ся з нами: radio@lem.fm, а догвариме дрібниці.