Не достали сте іщы дарунку? І барз добрі, бо св. Миколай прецін допіро приде! Не вірте в тото, што видите всядиль довкола. То мы маме рацию, не они 😉 і не дост, же сме о тым преконаны, то іщы маме 100% певніст, же кажда чытачка нашого порталю хотіла бы достати од хлопця/хлопа/нареченого/мужа/няня/діда/брата/уйка/стрыка/нонашкы значыт – СВ. МИКОЛАЯ, таку выняткову прикраску:
То ориґінальна лемківска кривулька, яку зробила знана зо свого кривулькового фаху – п. Анна Добровольска, родом зо східньой Лемковины (Віслок Великій), континуаторка родинной традициі вытворюваня кривулькы (пристуной в родині од найменьше штырьох поколінь), долголітня ведуча Стоваришыня Розвитку Шолтыства Крива.
Пані Анна подарувала тоту кривульку орґанізаторам Х Стрічы Любителів Низкого Бескіду, якы выставили єй на аукцию, а грошы будут переданы на ремонт креста в лемківскым селі Липна, котрий проведе Стоваришыня Маґурич. Орґанізаторы надіют ся, же на таку ціль щедры панове (а може і пані…) не поскуплят грошы і кривулька піде за направду добру ціну, а товды поведе ся выремонтувати дашто більше!
До кінця аукциі лишыло ся лем 5 дни (тырват до 11. грудня) – то акурат тілько часу, жебы выробити ся з презентом для вашой милой! Але што важнійше – завдякы когоси з Вас, поведе ся іщы на кусьцьок долше захоронити памят о лемківскых липнянах…
Крест в Липній, якій завдякы когоси з Вас остане выремонтуваний
Коментарі