Што на вікенд? – лем піти…

Хоснуючы передвікендовый час, хочеме заохотити на деякы акциі, якы будут проходити в найблизшых днях. Дути, уж подуло, а тепер і (перед)ярнє тепло заявляют…

Жытелі Варшавы і околиц можут выбрати ся в суботу 16. марця 2019 рока до Бемівского Центра Культуры при улици Ґурчевскій, де заграт знаный фольковый ансамбль Черемшына з Черемхы, то єст культурового погранича, де пересікают ся білорускы, польскы, украіньскы і татарскы традициі. Черемшына сігат часто і по русиньскій репертуар, зато можливе, же і заранішнім концертом вкаже як найшыршый діапазон своіх можливости. Концерт вечером, о 19.00 годині, а в само полудне одбудут ся в Бемівскым Центрі Культуры  вокальны варштаты традицийных пісен Підляша.

Фейсбуковый мотузок до подіі – гев.

Інформация о дальшій культурній ініциятиві, котра одбуде ся на полудне од Карпат двараз в найблизшый вікенд, тыкат вшыткых, але найбарже будут задоволены з ней тоты, котры 16. і 17. марця будут в Братиславі і Зволені. Там же заплянуваны выступліня авторского проґраму Штефана Штеця під наголовком “Справы, што ся діют”. То проєкт зрыхтуваный при спілпрацы і заанґажуваню Фольклорного Ансамблю Горнад. Основом того музично-хореоґрафічного проєкту сут історичны подіі по ІІ світовій войні на териториі Карпатской Руси. Посплітана доля головных героів Русинів, хлопця з Лемковины і дівчатка з Пряшівской Руси, мат вказати на спільне минуле і робити єй актуальном і на днес, на час, в котрым жыєме. Ансамбль Горнад єст словацкым ансамбльом, але в своім репертуарі представлят і русиньскій фольклор. Премєра представліня одбыла ся влони в Кошыцях.

Шырше чытайте за тым мотузком.

Тым, што за далеко до столиці, або як раз не сут на Словациі, рекомендуєме ся выбрати на проєкцию фільму названого «Така была наша доля», котрого емісия одбуде ся в найблизшу неділю, 17. марця, о 17.00 год. в Сельскiй Свiтлици в Ждыни. То ініциятива молодых люди, Томы Болеха і Перта Ротка, якы представляют спомины старшых люди, образуючы тяжкы рокы обох світовых воєн та інчых подій з істориі села і його околиц.

О тій подіі пишеме гев.

Як раз в тот вікенд не грат пряшівскій Театр Александра Духновича. Але уж од найблизшой середы, 20. марця, зас буде мож там завитати видіти професийональны пєсы. Лем з хыжы выйти…