Міся Фуртак выпустила перед двома тыжнями (25. січня/януара 2019 р.) новый альбом. Міся Фуртак бесідує, што хоц ціла єй родина то Лемкы з Низкого Бескіду, то єдны думают о собі як о Поляках лемківского походжыня, другы, што они Украінці, а іщы інчы – просто Лемкы. Ци має то дакє-небуд значыня для платні? Абсолютно ні. Кружок нияк не односит ся до вроджыня вокалисткы. Дармо глядати гын Пасла Ганця павы ци За поляном. І слава Богу! Кєд іде про мене, то уж єм пересычена робліньом штукы з постійным одкликуваньом ся до фольклору.
Платня Што приде? то єденадцет творів, в котрых в більшости чути вокаль Місі, два то выключні інструментальна музыка. Є то друга сольова платня артисткы. Першом была печатана перед шестьома роками Епка. Сінґльом промуючым кружок є Не зачынай, котрый заєдно отверат цедечеко. Єст альтернативні, аж і аванґардово, таємничо і мрачні, єст сила та деликатніст.
Моі першы минуты з альбомом Што приде? принесли учутя непокою і асоцияцию з морьом або буд-яком великом водом. Мож ся в ню занурити, захопити красом, дати ся понести, єднак то она рядит, обнимат цілом собом, може принести студін і страх, бо може взяти на все. Покрыват ся то з тым, што бесідує про платню сама артистка. Oповідат, што є то кружок о змінах. «Тых наремных та і тых, котры проходят помалы. О страху перед нима і тым, што не даст ся іх одвернути, про конечніст задаваня звідань, потребі одложыня в часі катастрофы, пробі будуваня ратунковых кораблів і надіі, же єднак не будеме іх потрібувати» – бесідує Міся. Вокалистка зазерат в глубину себе, освоює страх і пропонує музику, для котрой тяжко найти просту дефініцию.
Што приде? то платня утримана в єднакій музичній конвенциі. Чути деликатны ґітары, мінімалістичны клявішы і смыкы, внутрішній пульсуючый ритм практичні без схоснуваня перкусиі і очывидні мелодийный, але свідомый голос Місі. В пісни Памят сут смыкы, фалюючы ґітары, фраґмент, в котрым домінує електорніка, і хвиля з брудным звучыньом ґітары. Без штырьох рук зачынат ся деликатным бренканьом ґітары, котре остає на фоні для міцнійше розвиваючых ся смыків, сама Міся здає ся скакати своім співаньом по звуках, голос гейбы падат як краплі на воду. A little later то єдна зо штырьох співанок по анґлицкы. Настрій тырвогы будуваный є од першых секунд. Напятя тырват до самого кінця, бо вельоголосовы вокалізы Місі приносят лем кус злагоджыня. Іщы більшу непевніст приносит дальша співанка – Go to sleep. Брудны, ґранджовы звукы ґітары з того кавальчыка перенесены а і насилены сут в черговым кавальчыку Delusional. Буде гірше то твір, в якым дрифуєме по глубинах песимізму. Iнструментальный Тисяч не дозвалят одплынути ниґде дале. Скінчыт ся будит нас з оніричной атмосферы міцныма тріповыма ритмами. Залагоджыня духового стану приходит з інструментальным твором Space і пісньом Што приде?, котра заперат платню. Лем же мы в тій мелянхолиі плынеме дале…
Што принесе? то деликатна і ощадна платня, кєд іде так о музичну, як і текстову верству. Але в часах, коли довкола є так вельо шуму і крику, мінімалізм є як незворушена площына воды по бурі.
В награня вокалистка заанґажувала заприязненых музиків альтернативной сцены, сут то м.ін. Ганя Ранішевска, Пьотр Мадей ци Александер Орловскій. Выдавцьом платні є Аґора. Автором відеокліпу до Не зачынай є Пьотр Стасяк – режысер, сценописар, автор знимок і монтажыста документальных фільмів, лавреат вельох нагорід, м.ін. номінуваный до Европейской Фільмовой Нагороды. «Барз мі ся любит мозаіка, яку зробил до той пісні Пьотр Стасяк. В барз мінімалістичный спосіб оповіл про самітніст і тугу за близкістю, котрой ани серед інчых люди не можеме найти» – оповідат Міся Фуртак.
Міся Фуртак то вокалистка і басистка. Разом з ансамбльом Très.B была лавреатком Пашпорту Політикы в катеґориі популярной музикы і Фридерика в катеґориі дебют рока. В 2015 р. разом з Пьотром Каліньскым основали дует Francis. Рік пізнійше выступила на платни Войтка Мазолевского Chaos pełen idei, котра отримала статус золотой. Сольо, як Міся Фф, выдала в 2013 р. альбом Епка.
Час-до-часу зазерат до родинного Лося.
Фот. та інф. Аґора.
Коментарі