Сканзен в Бардейовскых Купелях рихтує ся на головну сезону. Зробила ся історічна інвестіція

Із приходом ярьных місяців поступно одкрывають ся браны експозіцій народной архітектуры – сканзенів, і сприступнюють ся унікатны деревяны храмы на северовыході Словакії.

Як аґентуру TASR інформовав директор Областной орґанізації турістічного руху Шаріш – Бардейов Радомір Янчошек, тот рік в центрі увагы буде головно сканзен в Бардейовскых Купелях, котрый вступує до юбілейной 60-ой сезоны по найвекшых інвестіціях у своїй новодобій історії.

В сканзені в Бардейовскых Купелях суть і цінны деревяны будовы із русиньскых сел, меджі іншым сакралны будовы із Микулашовой (даколи Никлова), Нижнього Верлиха ці Збоя.

Експозіція народной архітектуры в Бардейовскых Купелях, котра є орґанізачным одділіньом Шарішского музея в Бардейові, перешла в попереднім періоді великов технічнов обновов.

„Інвестіція в цілковій сумі понад 1,9 міліона евр концентровала ся головно на ратованя ставебных субстанцій і выміну матеріалів на стріхах, котры были в гаварійнім стані. Реконштрукція дотулила ся веце як 20 обєктів у ареалі, чім значно продовжыло ся жытя тых цінных доказів народного ставительства Вышнього Шаріша,“ пояснив Янчошек.

Як далше повів, роботы были заміряны передовшыткым на фахову памяткову обнову із выхоснованьом традічных матеріалів і поступів, „причім пріорітов было заховати автентічность деревяных конштрукцій“.

В рамках проєкту робили і розсягле дендролоґічне баданя, котре принесло новы науковы знаня о віці оремых гряд і точнішім датованю выникнутя обєктів.

Окрем домів на бываня і господарьскых будинків в ареалі домінантны суть два сакралны обєкты. Іде о ґрекокатолицькый деревяный храм із Збоя, котрый быв збудованый у 1766-ім році, і меншый ґрекокатолицькый храм із Микулашовой, якый є із 1730-го року. Обидва храмы суть в добрім стані, дають хосновати ся і на літурґічны потребы.

„Реконштруцкія бардейовского сканзену была неминучім кроком ку всокочіню културной дідовизны про далшы ґенерації. Навеце тот рік святкуєме 60-ту річніцю основаня той експозіції, што хочеме схосновати на іщі інтензівнішу пропаґацію реґіону,“ доповнив Янчошек.

В ареалі прибыли і новы технічны інтересности. Меджі найвызначнішы належыть фунґуючій польный гончарьскый пец, котрый служыть на вказованя старых ремеселных технік, наприклад і на традічне выпальованя керамікы.

Фото: FB/Expozícia ľudovej architektúry – skanzen.