Скеюшан просит до Хомутова

Ансамбль чешскых Русинів – Скеюшан – як што рока просит на своє свято. Уж 27. раз Скеюшане просят до Хомутова в Чехах, де нашли ся Русины по ІІ світовій войні. Тогорічны празднуваня річниці основаня ансамблю пройдут 13. мая традицийно в місцевым театрі в Йіркові (Jirkov). В проґрамі стрічы орґанізаторе рыхтуют на сам перед привитаня запрошеных гости з дома і заграниці, коротку доповід нт. істориі і досягнінь ансамблю за рокы діяльности, дальшы дискусиі і спомины, якы ся выявлят вчас тырваня подіі.

Того рока на культурну част проґраму Скеюшане попросли зас Лемківскій Ансамбль Пісні і Танця Кычера з Ліґниці, якій посліднім разом Хомутов одвиділ в 2014 р. Окрем Лемків з Польщы на сцені выступліня даст фольклорний ансамбль Козаці Покрова на Влтаве Прагы та очывидно ґаздове – Скеюшан. Як по інчы рокы, кінчучы культурну част проґраму, орґанізаторе просят на танцювальну забаву в допроводі ґрупы Міры Дупака.

Колектив явит ся типовым русиньскым фольклорным ансамбльом, а то зато, же в його репертуарі находиме заєдно спів, музыку, гуляня та обрядову част. Основателями ансамблю сут потомны Русинів, якы походили зо села Камюнка та Орябина. Тоты Русины в половині XIX ст. за роботом оселили ся в селі Скеюш в Румуніі, одкале по II світовій войні на заряджыня президента Ческословацкой Республикы мусіли переселити ся як раз на західні чешскы землі – головно до місцевости Хомутов. Члены той ґрупы по днес плекают русиньскій язык, традициі і пісні. Ансамбль Скеюшан был вельократні нагороджаний, м.ін. был лавреатом Медженародового Фольклорного Фестівалю Стражніце.