СКУтНіЕМ выповіла ся в справі дискримінациі меншын на Білоруси

Члены Спільной Комісиі Уряду та Нацийональных і Етнічных Меншын в Польщы подали своє становиско в справі дискримінациі нацийональных меншын на Білоруси, в тым польской меншыны, в обшыри вчыня меншынового языка і в языках меншын.

Вчера, то єст в середу, 27. квітня/апріля, на офіцийным профіли СКУтНіЕМ в сервісі Facebook явило ся писмо сиґнуване репрезентантом меншыновой страны Григорийом Куприяновичом, спілведучым Спільной Комісиі Уряду та Нацийональных і Етнічных Меншын. Писмо высловлює протест членів комісиі в звязку з діянями власти Білоруси, котры ограничают права нацийональных меншын, якы гын жыют, в квестиі вчыня меншынового языка і в языках меншын.

Русифікация шкіл на Білоруси

«Ліквідация вчыня в языках меншын та ограничыня вчыня материньского языка до єдной годины на тыжден порушат основны права громадян Білоруси, якы належат до нацийональных меншын. Вписує ся тото в політику русифікациі ведену режімом Александра Лукашенкы, котра порушат головні основны права білоруской нациі до захованя свойой достоменности і культуры» – чытаме в писмі.

В дальшій части документу меншынова страна Спільной Комісиі Уряду та Нацийональных і Етнічных Меншын высловлює свою солідарніст з нацийональныма меншынами жыючыма в білорускій державі. Члены комісиі приводят слова Міністерства Заграничных Справ в Польщы, котре одсудило діяня білорускых власти і подало, што русифікация вчыня в школах з польскым навчальным языком (в Городным, Волковиску і Бересті) то атак на основны права польской меншыны.

Дискримінацийны діяня не лем на Білоруси

Члены комісиі так само сут згідны з опінійом МЗС, што «ліквідация тых осередків [школы в Городным, Волковиску і Бересті – прип. ред.] для польской меншыны є не лем нарушыньом догваріня медже фундатором а локальныма властями. Такє діяня перечыт медженародным умовам і зобовязаням Білоруси».

Члены комісиі підкрисляют, што діяня власти Білоруси явні нарушают европейскы стандарды трактуваня нацийональных меншын, дискримінуют і стиґматизуют меншыны, в тым польску на Білоруси. Представникы меншын в польскым уряді подают тіж, што розуміют обуріня і страх польской меншыны на Білоруси, што звязаны сут з драстичным ограничыньом доступу до вчыня материньского языка, в звязку з тым, што подібна ситуация є так само і в Польщы – то ограничыня доступу до вчыня языка німецкой меншыны.

Апель о пошануваня прав

Писмо закінчене є апельом до уряду Білоруси стримати ся од діянь, котрых цілю є асиміляция – «значыт в практиці русифікация нацийональных меншын, в тым автохтонной польской меншыны на Білоруси».

Члены комісиі звертают увагу, што в контексті нацийональных меншын важне є, штобы не хоснувати принципу взаімности, «згідно з якым громадяне даной державы стают ся закладниками медженародных односин ци медженародной політикы».

На конец представникы меншын выражают надію, што пошануваня і підпора вчыня языків нацийональных меншын на Білоруси будут заґарантуваны найменше на такым рівни, што і до 2022 рока.