СЛ рыхтує ся до ІХ Конґресу орґанізациі

В найблизшу суботу, 3. липця/юлия, в Ліґници пройде ІХ Конґрес Стоваришыня Лемків. Хоц сеса подія была рыхтувана на квітен/апріль текучого рока, з причыны тырваючых в тамтым часі ограничынь годна ся она одбыти аж тепер.

Формально конґрес має за задачу предовшыткым выбрати новы власти Стоваришыня, кєд же по змінах статуту проведеных в 2019 р. каденция начальных власти орґанізациі была скорочена до двох років.

Як інформує ведучый СЛ, Андрий Копча, ІХ Конґрес має зачати ся о 11.00 год. Кус скорше одбуде ся формальна реґістрация делеґатів і запрошеных гостів.

Єдным з першых пунктів засіданя буде представліня справопису з діяльности Головного Заряду за 2019-2021 рр. та выборы новых членів заряду. По введеных змінах статуту на VIII Конґресі, Головный Заряд не лем має скорочену каденцию (скорше были то штырі рокы), але і склад заряду єст меньшый о пару осіб. Окрем выборів ведучого і членів Головного Заряду, якій єст выконавчым орґаном, вчас конґресу одбудут ся выборы до Головной Ревізийной Комісиі.

На конґресі присутны будут члены уступуючого заряду, делеґаты выбраны перше в локальных кружках та запрошены гості. Само засіданя буде проходило в гыбридовій формулі, кєд же част з делеґатів буде брала в ним участ при схоснуваню інтернету, маючы можливіст кандидуваня і оддаваня важных голосів.

Дотепер одбыло ся вісем конґресів, а окрем них і штырі Надзвычайны Конґресы, якы были посвячены текучым проблемам і внескам складаным членами орґанізациі. Першый – історичный – конґрес СЛ одбыл ся 8. грудня/децембра 1990 р. в Ліґници. То найстарша і найбільша повыселенча лемківска орґанізация в Польщы.