Словакія потягне автостраду на переход Вышнє Німецьке – Ужгород

Як інформовала аґентура TASR, Україна потвердила як пункт приключіня планованой автострады D1 в части од села Бідовці ку україньскій граніці переход Вышнє Німецьке – Ужгород.

На тім гранічнім переході о тім в понедільок  24-го октобра 2022-го року інформовав радник председы влады Словацькой републікы про черезгранічну співпрацу Едуард Бураш.

„Жебы могла закінчіти ся мултімодална штудія, котра ся приготовлює про тоту часть автострады, є барз важным, жебы україньска сторона конкретно писомно выраховала пункты приключіня. І днесь было потверджено, же тым пунктом буде гранічный переход Ужгород – Вышнє Німецьке,“ повів Бураш.

Обіцяють докінчіти переход

Частьов їднаня была і кооперація сил на граніцях меджі словацьков і україньсков сторонов. Нароснутя накладного транспорту на граніцях запричінює комплікації в довжці часу, котрый на граніці треба чекати.

„То запричінене тым, же україньска сторона не має докінченый гранічный переход про особный транспорт, котрый ся довгодобо ремонтує. Но днесь нам потвердили, же здобыли фінанції на технічму поміч в сумі 1,2 міліона евр. Приобіцяли при тім, же до кінця року бы мав быти гранічный переход Ужгород – Вышнє Німецьке з україньского боку докінченый, што бы одлегшало накладный транспорт,“ повів Бураш.

Автобусовый транспорт, котрый є теперь прямованый на накладный транспорт, бы тым вернув назад на свій бік і скоротили бы ся подля нього часы чеканя, котры досягують актуално кінцьом тыждня дакілько годин.

Переход потребує іншфраштруктуру

Презідент Фінанчній справы Словацькой републікы Їжі Жежулка конштатовав, же не іде лем о вопрос капаціт гранічного переходу, але і о добудованя інфраштруктуры, о чім обидві стороны знають.

„Можеме выбудовати красный гранічный переход про 300 каміонів на день, але покля на нього не буде надвязана інфраштруктура, пак проблему лем перенесеме на драгы в околіці і до сел, а то бізовно не є рішіньом, котре бы сьме преферовали,“ повів.

Переход Вышнє Німецьке подля нього актуално знає спрацовати 120 каміонів за 24 годин, што была недостаточна капаціта уж перед войнов.

„Глядаме зато можливости, як посилнити технічный выкон, персоналный выкон, але будеме обмеджованы капацітов драг околіці,“ повів.

Добудованя австострады од Бідовець аж на переход, а єдночасно сповніня условій з україньской стороны, бы так помогло вырішыти много проблем, котры днесь суть лем тяжко рішательны.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА