Словакія рішыть вызнаня вєтнамской меншыны. Буковскый припоминать, же вызнаны хотять быти і Ґуралі

Як інформує аґентура TASR, вєтнамска комуніта жыюча на Словакії бы могла быти офіціално вызнана за народностну меншыну. Выходить то з матеріалу публікованого на леґіслатівнім порталі Slov-lex, котрый мож припомінковати.

„Пропонуєме, жебы вызнаня вєтнамской комуніты жыючой в СР за народностну меншыну реалізовало ся приятьом узнесіня влады Словацькой републікы,“ пише Міністерство справедливости в супроводній справі.

Імпулзом ку передложіню пропозіції до меджірезортного припомінкового процесу было узнесіня Рады влады Словацькой републікы про людьскы права, народностны меншыны і родову рівность із 28-го новембра 2022-го року. Матеріал мож припомінковати до 10-го фебруара.

Уряд уповномоченого влады СР про народностны меншыны не має жадных припомінок односно передложеной пропозіції. Но уповномоченый Ласло Буковскый припоминать, же подобну жадость на Міністерство справедливости СР адресовали і представителі ґуральской меншыны. Тота так само не має затля на Словакії статус офіціалной меншыны.

„Уповномоченый надіять ся, же споминанов пропозіційов в скорім часі буде одповідно занимати ся Рада влады СР про людьскы права, народностны меншыны і родову рівность,“ інформовав о Буковского становиску ведучій секретаріату уряду уповномоченого Золтан Ковач.

В остатнім списованю жытелів із 2021-го року ся ку вєтнамскій народности на Словакії приголосило 2793 людей, 489 собі єй дало як далшу народность. Хоць офіціално не были публікованы даны о тім, кілько людей приголосило ся ку Ґуралям, за нашыма інформаціями то было коло 5000 людей.

Того часу є на Словакії вызнаных 13 народностных меншын. Меджі три найвекшы належыть мадярьска, ромска і русиньска. Далше суть вызнаны як меншыны Чехы, Мораваци, Поляци, Українці, Сербы, Булгары, Німці, Хорваты, Жыды і Росіяны.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА