Словацька влада выменовала уповномоченого про меншыны. Кабінет має в плані рушыти меншыновый фонд

Влада Словацькой републікы на своїм засіданю в середу 20-го децембра 2023-го року выменовала нового уповномоченого про народностны меншыны. Тота функція была необсаджена од 25-го октобра, коли быв одкликаный Ласло Буковскый.

Новым уповномоченым влады Словацькой републікы про народностны меншыны став Акош Горонь. Його выменованя є схвалене ку 21-му децембру.

Словацька влада так само публіковала леґіслатівный план на 2024-ый рік, в рамках котрого хоче зрушыти меншыновый фонд.

Акош Горонь

Мґр.арт. Др.Юр. Акош Горонь (1975 р.) є родаком із Дунайской Стреды. Абсолвовав штудії на Высокій школі вытварных умень в Братіславі, і на Католицькій універзіті Петра Пазманя – на Факулті права і державы, в Будапешті.

Горонь быв умелцьом у вольній професії, пізніше быв і асістентом державного секретаря Міністества културы Словацькой републікы ці асістентом депутата Народной рады Словацькой републікы.

В остатніх роках быв і членом языковой експертной ґрупы про мадярьскый язык на Уряді уповномоченого влады СР про народностны меншыны. Тоты ґрупы про окремы меншыны приготовлюють до языків меншын переклады законів, меджінародных договорів і далшых матеріалів.

Акош Горонь є так само депутатом Містьского заступительства в Дунайскій Стреді а председом Комісії Містьского заступительства в Дунайскій Стреді про справы хоснованя языка народностной меншыны.

За нашыма інформаціями має новый уповномоченый близко ку мадярьскій владі Віктора Орбана. За мадярьску сторону сидів і на засіданях Змішаной словацько-мадярьской комісії про справы меншын.

Влада хоче рушыти меншыновый фонд

Словацька влада так само пубкіковала План леґіслатівных задач влады СР на рік 2024. На місяць юн є напланона Пропозіція закона о Фонді на підпору културы, котрой ґестором має быти Міністерство културы.

„Пропозіція закона буде передложена на основі Проґрамового выголошіня влады Словацькой републікы 2023 – 2027. Фонд на підпору културы буде давати підпору културі в слідуючіх областях: державный язык і словацька література, жыва култура, културна дідовизна, і култура народностных меншын. Фонд выникне реорґанізаційов дотеперішніх верейноправных фондів, котра має реалізовати ся злучіньом Фонду на підпору уменя і Фонду на підпору културы народностных меншын,“ пише ся в матеріалі.

Приятьом такого закона бы ся зрушыли два існуючі фонды, меджі нима меншыновый, а зробив бы ся єден новый. План леґіслатівных задач влады СР на рік 2024 є моментално в меджірезортнім припомінковім процесі.

Выникла уж громадна припомінка

Фонд на підпору културы народностных меншын выникнув у 2017-ім році, почас третьой влады Роберта Фіца, коли в коаліції мала його партія Smer-SD і партію Most-Híd. Першы вызвы з фонду были на рік 2018.

Проти рушіня меншынового фонду уж выникла громадна припомінка, котрой орґанізаторами суть Конрад Ріґо, Ласло Буковскый і Абел Равас.

„Фонд на підпору културы народностных меншын єдночасно є і єдинов законом зрядженов інштітуційов народностных меншын на Словакії. Зато тота інштітуція є з погляду правного поставліня народностных меншын елементарно важнов, і їй зрушіня, респектівно злучіня з іншов інштітуційов, бы значіло єднозначный крок назад і з людьскоправного погляду,“ пишуть орґанізаторы припомінкы.

В припомінці ся пише і то, же дві области, о котры ся теперь окремо старать Фонд на підпору уменя і Фонд на підпору културы народностных меншын, суть незлучітельны.

„Новый фонд бы не доказав повнити свою задачу выходячу із закона ани в области підпоры културы народностных меншын, ани в области підпоры словацькой културы – што мало быти первістным заміром законодавцю.“

Як далше пише ся в припомінці, зряджіня народностного фонду в році 2021 оцінила і Змішана мадярьско-словацька комісія про справы меншын, як і Рада Европы в послідній Справі о імплементації Рамкового договору на охрану народностных меншын в СР.

Покля сьте гражданом Словацькой републікы, і хочете підписати припомінку, можете так зробити ту.