Словник лемківского слова

20 жолтня в областній бібліотеці в Івано-Франківску одбыла ся стріча з Ігорьом Дудом з Тернополя. Ігор Дуда походит з Ганчови, тепер єст редактором газеты “Дзвони Лемківщини”. Єст тіж автором “Лемківского Словника” і книжочкы лемківскых приповідок. На штоден Ігор Дуда – то директор художнього музею в Тернополю. То чловек вельо талантів, єст публицистом, мистецтвознавцьом, автором книжок про історию і культуру тернопільской земли.

В бібліотеці щыро оповів, як найперше зачал глядати приповідок, а пак взял ся за словник. В украіньско-лемківскым словнику хотів вказати при тлумачыню украіньскых слів на лемківскій богатство синонімів, ріжны формы. Словник был виданый в Тернополю два роки тому. Словник Ігора Дуды, як і словник Ярослава Горощака – то здвига чловека, котрий не єст філологом, але так любит лемківску мову, же уклал дост грубий словник (26 000 слів).

Уклал, а попри тому достал свою порцию критикы од фаховых філологів. Нич то прецін, кед не міг ся діждати од них през долгы роки ниякого словника.

На стрічу пришли ріжны люде. Не лем Лемкы, але каждого тема хоц кусьцьок зацікавила. А хто іщы не мав той книжкы, то при кінци пришли до автора сой го купити а при нагоди дістати автограф.