«Слово» – 1-ша неділя Великого посту – неділя, 9.00 год.

Перешов першый ыждень святого часу посту. Субота і неділя того тыждня нам указує на дві побіды. Перша є побіда над высмівачом і одступником од Хріста – імператором Юліаном, котрый хотів зневажыти і высміяти хрістіаньскый піст а тым самого Хріста.

Але быв сам высміяный. Бо Господь послав свойого мученика Теодора, котрый ся появив патріархови і наказав, жебы нич на торгу не куповали, бо суть вшыткы їдла покроплены кровльов з ідольскых жертв. Намісто того святый мученик наказав зварити пшеніцю з медом – што звало ся у них колива або кутія.

Памятку той чудесной захраны вірных перед тым высмівачом Церьков установила на першу суботу Великого посту. В тот день ся посвячує колива або кутія.

Другов побідов є побіда над іконоборством. Блуднов науков, котра не признавала оддавати честь святым іконам. Другый нікейскый собор одсудив іконоборство і потвердив честь оддавати святым іконам. Но перешло іщі много часу, покы ся подарило знову обновити честь святых ікон. То ся одбыло за цариці Теодоры і сына Михаіла, коли патріарха цариградьскый вєдно з духовнеством і вірныма за участи імператора торждественно оддали честь святым іконам. Так по роках переслідованя і проливаня хрістіаньской крови пришла про Церьков побіда.

Но тот день нам говорить іщі дашто глубше. Святый Василій хоснує слова: Честь оддавана образу переходить на першообраз. То нам указує, же і мы маме быти образом – іконов Хріста в тім світі і в тім стані, де нас Божа воля поставила. Там маме выдавати свідчіня, жебы люде, видячі нашы добры діла, діла любви, милосердя і покоя, прославляли Бога і самы были потягованы стати ся таков іконов.

Най тоты дві побіды, котры нам Свята Церьков в тых двох днях ставить перед очі, допомагають нам в постнім намаганю і зростаню в любви ку Хрістови і ближньому. Слава Ісусу Хрісту!

В неділю, 13. марца 2022 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 13. марца о 12.00 год. і 14. марца о 2.00 год. за русиньскым часом.