«Слово» – 10-та неділя по Сошествії Святого Духа – неділя, 9.00 год.

Ісус Хрістос сходить із горы Тавор вєдно з Петром, Яковом і Йоаном. Приходить ку народу, там приходить за Ним отець єдного хлопця, котрого мукарив нечістый дух.

Ученикы не могли його выздравити, а так тот отець якбы оскаржує учеників в безсилности. Як Ісус тото чув, говорить ку народу: О, невірне і розпустне поколіня. Чом так Ісус реаґує? Бо і коли коло Ісуса сходило ся много народа, Ісус видів їх душы.

Єдны з них были фарізеї, учітелі закона, котры хоць мали познаня Писма, пророків, книг Мойсея, псалмів, де вшытко указовало на Хріста, наперек тому не увірили. А тото невірство вело їх до ненависти ку Хрістови. Не могли высловити ани Його імя, не хотіли Го мати на своїх устах.

Тото ся діє з чоловіком, котрый находить ся в рабстві гріха. Находить ся в темноті а ненавидить світло. Ісус то повів ясно: Хто є в темноті, ненавидить світло а не іде на світло. А хто є тым світлом? Ісус, бо Він сам повів: Я єм світло, хто мене наслідує, не буде ходити в темноті.

Друга катеґорія были тоты, котры хоць і приходили слухати Ісуса, были свідками Його чудесных діл, смотрили на земне, были привязаны ку тому земному. Коли Ісус говорив слова, глядайте наперед Боже царьство, они глядали нагоду як накормити залудок. Хотіли Його взяти і зробити земным царьом, котрый їм буде давати вшытко земне.

А так єдны і другы обаламучены діаволом. Першы не увірили, впали до ненависти ку Хрістови а намагали і іншых одорвати од Хріста. Другы не з ненависти, але з привязаня ку земному, впали до сітей діавола, жебы смотрити лем на земне, лем ту глядати рай і забыти на вічность.

Як правдивы были тотя Хрістовы слова: О, невірне поколіня! Як актуалны суть і про нас, і про наш добу. Слава Ісусу Хрісту!

В неділю, 13. авґуста 2023 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 13. авґуста 2023 р. о 12.00 год. і 14. авґуста 2023 р. о 2.00 год. за русиньскым часом.