«Слово» – 11-та неділя по Сошествії Святого Духа – неділя, 9.00 год.

Образный приклад о царьови, котрый собі здумав зробити рахунок зо своїма рабами, нам говорить о важности Божого слова о суді. Тото слово нам говорить, раз буде суд зо вшыткого того, што маме на тій землі.

Буде суд і з нашых довгів. Што суть то за довгы? Тото слово нам выображать раба, котрый довговав велику частку – десять тісяч талантів. Є то превелика сума, котру собі ани не знаме представити, Кедь не мав як сплатити довг, царь наказав його продати і жену і діти і цлілый маєток. Тот раб падать ку ногам царя і просить, будь великодушный, і я ті верну вшытко і коли знав, же ся то не дасть. Царь посановав того раба і одпустив йому цілый довг.

То нам указує, же нашы довгы ку Богу суть нашы гріхы, їх великость ся не дасть порівняти з нияков цінностьов на зелмі. Они суть образом Найвысшого Бога, невдячностьов, послуханьом порады злого. А Бог наперек тому є так скорый нам вшытко одпустити.

Потім видиме іншу сітуацію, тот самый раб, котрый лем перед хвільов зазнав Божу доброту на собі, коли вышов з тым якбы декретом од одпущіню, тогды стрітив ся з єдным зо своїх сорабів свого царя. Тот йому быв довжен сто дінарів. Яка маленька а смішна частка в порівнаню з тыма талантами. Тот раб його просить тыма самыма словами, котрыма він сам просив перед моментом царя, будь великодушный … Но він не хотів. Дав го заперти до вязніці. Тогды собі його царь закликав і говорить йому: Лукавый рабе, та смоть, я тобі одпустив цілый довг, бо ты ня просив. Та ці і ты не мав зробити так само?

Розгнівав ся тот царь і дав наказ його шмарити до вязніці.. А Ісус закончує, так зробить і вам і мій небесный Отець, кедь каждый із нас не одпустить свойому братови його провины.

Так видиме человіколюбіє Боже, Його приготовленость вшытко одпущати, но мать условя записане в молитві: Отче наш. І остави нам довгы наша, якоже і мы оставляєм…

Тым условієм є одпущіня нашым ближнім. Хоць бы дахто говорив: то несправедливо, тадь тамтот мі уближыв, скривдив, одплатив моє добры діла злом, неждячностьов. Тото вшытко є ничім в порівнаню з нашыма гріхами. Слава Ісусу Хрісту!

В неділю, 20. авґуста 2023 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 20. авґуста 2023 р. о 12.00 год. і 21. авґуста 2023 р. о 2.00 год. за русиньскым часом.