«Слово» – 13-та неділя по Сошествії Святого Духа – неділя, 9.00 год.

В днешнім слові Євангелія Ісус Хрістос хоснує образный приклад о робітниках у винограді. Уж слово образный приклад або притча значіть то, же нам хоче подати штось важне про наш духовный жывот і наше спасіня.

Образный приклад говорить о чоловікови домовладыкови, котрый насадив виноград, обгородив го плотом, поставив вежу, зробив преш. Іншыма словами приготовив вшытко потрібне, так передав робітникам а одышов на даякый час. То слово передав не значіть, жебы їм дав як маєток тот виноград, але жебы были справцями того винограду і одовздали з плодів винограду як прийде час.

Тоты робітникы были з тым согласны. Гей, так зробиме, як од нас пожадуєш. Но як пришов час збераня грозна, послав ку ним рабів по плоды. Но робітникы уж не памятали на тото доїднаня, котры зробили з домовладыком. Але зачали зневажати рабів, убивати, высмівати і дакотрых послали напорожньо. Так робили за каждым, коли їм послав рабів по плоды.

Не заставили ся ани перед сыном. Але іщі веце їх то выпровоковало, позбыти ся убивством сына. Бо сі думали, же тогды уж мають одкрыту дорогу, же виноград належав їм. Но тогды вертать ся домовладыка, злых з гнівом загубить а виноград передасть іншым.

Кедь пресатвителі ізраільского народа чули тоты слова, порозуміли, же о них тото говорить. Радили ся, як його убити. А так тото слово односить ся на першім місці ку ізраільскому народу. Указує на Божу старостливость о выбраный народ, але тыж указує і невдячность Ізраіля ку свойму сотворительови.

І даме собі опрос: Чом так реаґовали тоты робітникы? Бо забыли, же они суть лем справцями. А тото є головне посолство днешнього слова і про нас. Як і наш великый учітель св. Василій говорить: Всягды, на каждім місці носити зо собов спасительну думку на Бога. А же Бог смотрить на наше слово, діло і думку. Але кедь чоловік зачне убивати тых послів – рабів, то є свою совість, прийде несподівано домовладыка. То є, коли чоловік находить ся в рабстві гріха, і одверьгує Божых послів, то є різны сітуації жывота і вытыканя совісти, што мать вести до покаяня, тогды домовладыка верне ся, настане момент рахунку за жывот і дары, котры нам Господь дав.

Прото все памятайме, же маме Господа над собов і Він смотрить нашы слова, діла і думкы. Слава Ісусу Хрісту!

В неділю, 22. септембра 2024 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 22. септембра 2024 р. о 12.00 год. і 23. септембра 2024 р. о 2.00 год. за русиньскым часом.