«Слово» – 14-та неділя по Сошетствії Святого Духа – неділя, 9.00 год.

В днешнім євангелію Ісус говорить образный приклад о царьови, котрый приготовляв свадьбу свойому сынови. Як было вшытко приготовлене, післав повісти запрошеным, жебы уж пришли на свадьбу, но они не хотіли, так посылать і іншых рабів, ани тых не слухають, і так посылать закликати тых, што найдуть, кідь запрошены суть того недостойны. Но як царь пришов посмотрити гостів, нашов там чоловіка без свадьбляного облечіня, і му говорить: Приятелю, як ты ту так пришов без того облечіня. Но він є тихо. І давать наказати його звязати і вышмарити до вонкашньой тмы. Ісус своїм словом говорить о великій Божій любви, о Божій довготерпезливости. Бог не хоче смерти грішника, но його навернутя. І чекать теперзливо, но прийде момент, кідь Господь прийде оддати каждому подля його діл. Тот чоловік без облечіня є образом тых, што хоць увірили, но не жыли подля віры, не цінили собі тото покликаня, оддавали ся земным роскошам, насолодам, гріху. Были віруючіма лем формално. Ту, на земли, є то скрыте, но раз ся выявить, хто якый є. Старайме ся брати серьйозно Боже слово і жыти подля нього, жебы раз не учути: Приятелю, як же ты ту без свадьбляного облечіня. Слава Ісусу Хрісту!

В неділю, 10. вересня/септембра 2017 р., о 9.00 год. проґрам «Слово», котрый реалізує єромонах Маркіян ЧСВВ. Повторіня 3. вересня/септембра 2017 р. о 15.00, 20.00 год. і 11. вересня/септембра o 2.00 год. за русиньскым часом.

Фото: Подобеньство о свадьбі, Андрій Міронов, 2014 р. Жрідло: Wikipedia.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА