«Слово» – 16-та неділя по Сошетствії Святого Духа – неділя, 9.00 год.

В днешнім євангелію Ісус говорить образный приклад о чоловікови, котрый одходячі на далеку дорогу закликав своїх рабів і розділив їм свій маєток. Єдному дав пять талантів, другому два а третьому єден, подля їх способностей і такой одышов.

Тоты, што прияли веце талантів, господарили і набыли по двараз тілько, но тот, што прияв єден, закопав талант до землі. По довгім часі, кідь ся пан вернув, зачав раховати ся з нима. Першы двоє діставають похвалы і позваня до радости свого пана, но третій ся оправдує і так чує із уст пана страшны слова: підлый рабе і лінивый… шмарьте го вон до тмы.

Тот образный приклад говорить о Божых дарах, котры Бог каждому щіро уділює, но єдночасно і о великій зодповідности як із нима наложыме. Чоловік мать на землі слободну волю, може нарабляти з Божыма дарами ці духовныма, ці матеріалныма, як хоче, но раз прийде день рахунку, кідь каждый буде ся зодповідати з того, як з тым даром наложыв. Што значіть набыти далшы два ці пять талантів? То є выхосновати на служіня нашым ближным, тым ся помножують Божы дары. А так старайме ся в тім куртім часі нашого земного жывота добрі выхосновати Божы дары на хосен нашых ближных, жебы сьме і мы могли з уст вічного Судцю учути слова: добрі, рабе добрый і вірный… войди до радости свого пана. Слава Ісусу Хрісу!

В неділю, 24. вересня/септембра 2017 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 24. вересня/септембра 2017 р. о 15.00, 20.00 год. і 25. вересня/септембра o 2.00 год. за русиньскым часом.

Фото: Paulamaria Walter: Die anvertrauten Pfunde. Жрідло: Wikipedia.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА