«Слово» – 17-та неділя по Сошествії Святого Духа – неділя, 9.00 год.

Ісус Хрістос приходить до країв Тіру і Сідону. Там його стрічать поганьска жена, Хананейка, котрой дівочку мукарив нечістый дух. Она просить Ісуса о поміч. Но Ісус не реаґує.

Як кебы ани не чув слова болю, терпіня той матери. Ученикы йому говорять, послухай єй. Но нін одповів: Я посланый ку вівцям Ізраіля, котры пропали. Тогды тота жена пришла ку ньому і просить його. А він реаґує іщі твердше: Не є добрі взяти хліб од дітей і шмарити псам. Но она на то: Маш правду, но і псы їдять одробинкы. Тогды Ісус повів: Жено, твоя віра є велика. Най буде так, як хочеш. А дівочка такой выздравіла.

Тото слово указує нам велику любов Ісуса ку выбраному народу. Хоць намісто вдячности од выбраного народа за то одповідали они невдячностьов і злобов. А він не переставать робити вшытко, жебы їх захранити.

Тыж указує і то, як смотрили Жыде на іншы народы. Называючі їх псами. Хотів указати, з якым погорданьом смотрили на них. Ісус пришов тото змінити. Пришов указати, же він хоче спасіня каждого. Тыж указує на велику віру той жены. Хоць была поганка, свойов віров, покоров перевышыла і тых, што ся тримали, же суть выбраный народ.

Так нам тото слово указує на важность жывой віры в Хріста. А тыж на никого не смотрити зверьху, з погорданьом. Бо може стати ся, же тот, котрого мы одсуджуєме, ним погордаме, нас може перевышати і быти близшый Богу. Слава Ісусу Хрісту!

В неділю, 17. октобра 2021 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 17. октобра о 12.00 год. і 18. октобра о 2.00 год. за русиньскым часом.