«Слово» – 19-та неділя по Сошествії Святого Духа – неділя, 9.00 год.

Днешнє слово Євангелія говорить нам о любви ку ближньому. Ісус Хрістос наперед говорить: Як вы хочете, жебы люде робили вам, так робте і вы їм.

Но кебы лем тоты слова сьме мали денноденні перед очами, як бы ся цалком змінив тот світ. Нихто бы не робив зло тому другому, памятаючі, же ани він не хоче, жебы то робив дахто йому. Перестало бы насилство, злоба, злодійство, облесны слова, стараня перехытрити другого, гляданя властных выгод.

Но Ісус іде дале і указує самоперше любов, котра глядать выгоду, ці чекать одповідь в єднакій мірі. Кедь любите тых, котры вас люблять, робите добро тым, котры вам так роблять; пожычавате, од котрых чекате назад своє. А кедь смьме лем на такій формі любви ку ближньому, Ісус нам адресує слова – яку заслугу за тото чекате, тадь так роблять і грішникы а погане.

А выводить нас высше ку хрістіаньскій любви ку ближньому – любте своїх неприятелів, робте добрі, жычайте а нич не чекайте. Любити тых, котры нам роблять зло, одплачають ся за наше добро невдячностьов, тото не є легке. Але ку тому нас Ісус позывать. А обіцять: Ваша нагорода буде велика – будете сынами Найвысшого. Він є добрый і невдячным і підлым.

За приятя тых слов а воведеня до жывота Ісус обіцять велику нагороду – будете сынами Найвысшого. Будете дітми Царя царів і владыку владык. А коли говорить о страшнім суді, додав: што вы зробили єдному з найменшых, мі сьте то зробили. Подьте, будьте наслідниками мойого Царьства.

Прото приймиме слова нашого Господа а старайме ся подля них жыти. А кедь нам є таяжко, смотьме на приклад самого Господа, котрый є добрый, любить каждого. Не хоче смерти ани того найвекшого грішника, але його покаяня і вічный жывот. Будьме і мы милосердны, як є милосердный наш Небесный Отець. Слава Ісусу Хрісту!

В неділю, 23. октобра 2022 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 23. октобра 2022 р. о 12.00 год. і 24. октобра 2022 р. о 2.00 год. за русиньскым часом.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА