«Слово» – 19-та неділя по Сошествії Святого Духа – неділя, 9.00 год.

Ісус Хрістос в днешнім слові учіть нас педаґоґікы любви ку ближньому. То значіть другу частинку головной заповіді. Перша є: Будеш любити Господа твойого Бога… а друга: свого ближнього як самого себе.

Наперед ставить перед нас людьску мотівацію. Яка то є? Што хочете жебы люде робили вам, тото робте і вы їм! Кебы лем тоты слова мали сьме перед очами а жыли подля них, як бы ся змінив тот світ зо землі на небо? Перестали бы злодійства, убийства, огваряня, клеветы, высміваня, понижованя, войны…

Бо кедь подумам, же тото вшытко не хочу, жебы дахто робив мі, та ани я не мам так робити другому.

Другов мотіваціов є порівнаня з поганами. Кедь любите лем тых, котры люблять вас, або жычате лем тым, од котрых надієте ся дістати своє назад, тогды яку нагороду зато чекате? Тадь і грішникы, і погане роблять так само. А додавать высшый ступень: Но вы любте своїх неприятелів, робте добрі, жычайте, а нич за то не чекайте.

Но тото уж не є легко выповнити. Нелем же не робити зло, нелем робити добро тым, а любити тых, котры люблять нас, але тыж робити добро а любити і своїх неприятелів. А коли ся вытисне тот вопрос, а што зато? Што з того будеме мати? Ісус давать і ту одповідь: Ваша одміна буде велика. Будете сынами Найвысшого!

Він є добрый і ку невдячным і підлым. А ту нас выводить на высоту Господь. Любити ближнього і любви ку Богу. Він нас не переставать любити, ани не переставать подавати свої добра нам ани тогды, коли робиме гріх, коли ся за Його доброту одвдячуєме нашов невдячностьов.

Коли і мы так будеме робити в одношіню нашых ближніх, обіцять нам, же ся ку нам публічно зголосить – тото є моя люба дітина, в котрій мам залюбліня. Войди до радости свого пана! Приймиме і мы тоты слова а най они войдуть до нашого жывота і принесуть плод любви ку нашым ближнім. Слава Ісусу Хрісту!

В неділю, 15. октобра 2023 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 15. октобра 2023 р. о 12.00 год. і 16. октобра 2023 р. о 2.00 год. за русиньскым часом.