«Слово» – 2-га неділя Великого посту – неділя, 9.00 год.

Перешов уж другый тыждень того благодатного часу Святой штиридсятніці. І днешнє слово нам давать много хосенных думок до нашого духовного жывота.

Євангеліє Другой постной неділі нам указує на потребу жывой віры а твердости в рішінях іти ку Хрістови, не дати ся ничім одрадити. Четверо мужів несли невладного, но не могли прийти ку Ісусови про много народа, котрый ся тиснув в домі. Не было місця ани при дверях. Они ся не вздавають. Їх віра была велика, коли принесли того чоловіка.

Несли його через місто. Чом? Бо вірили, же Ісус може йому помочі. А як пришли ку дому, виділи, же народа є вельо і не зможуть ся дістати ку Ісусови. Вынесли хворого на стріху, пробили діру до повалы. А Ісус, видячі їх віру, говорить невладному: Сыну, одпущають ся тобі твої гріхы.

Ісус видів їх віру, добре наміріня, твердость рішіня, але видів і проблему того чоловіка, а то быв гріх. Прото наперед вилічів душу, а аж так йому повів: Встань, возьмий свою постіль, а ідь. А тот такой встав, взяв свою постіль, а ішов.

Тото слово і нас позывать прийти ку Ісосови з нашов хворов душов од гріхів, жебы учути слова: Одпущають ся тобі гріхы. Но много раз і перед нами стоять барьєры, перешкоджіня, котры діавол ставить на дорозі ку Хрістови. Котры то суть?

Ганьбливость: перед гріхом указує на маленькость того гріха. А по гріху указує на його великость, так хоче одрадити од покаяня. А кедь ся му то не подарить, тогды высувать далшы барьєры: звалити вину на другого і себе оправдовати як то видиме уж в раї на Адамови і Єві. Або не признати ся, затаїти зо страху перед стратов доброй думкы о собі – тото видиме на Каїнови.

Тых четверо ся не взадало, ани мы ся не вздавайме в тім часі нашого постного подвигу. Приходьме ку Хрістови, не смотрячі на різны перешкоджіня. Приходьме з віров а твердым рішіньом в сердці. Так і мы учуєме: Довіряй, одпущають ся тобі твої гріхы.

А як буде здрава душа, тогды і слова: Встань а ідь – жый новым жывотом подля Божой волі а Його заповідей. Слава Ісусу Хрісту!

В неділю, 12. марца 2023 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 12. марца 2023 р. о 12.00 год. і 13. марца 2023 р. о 2.00 год. за русиньскым часом.