«Слово» – 21. неділя по Сошествії Святого Духа – неділя, 9.00 год.

Іус Хрістос говорить образный приклад о сіячови, котрый вышов россіяти своє зерно. Як сіяв, єдно пало на край дорогы, де його выдзобали небесны птахы або топтали люде. Інше до камянистой землі, не мало коріня і высохло.

Далше до терня, терня росло і го задавило. А наконець далше до доброй землі і тото єдно з них принесло плод. Тот образный приклад нам указує на Божество ХС. І пророкы в Старім завіті сіяли зерно Божого слова, але не як своє. Тото стведжовали словами: Так говорить Господь. Но Ісус Хрістос не так робить. Він при своїх словах говорить: Я вам говорю. Приношать зерно свойого слова. Земля суть людьскы душы і сердця, котры слухають тото слово.

Ту видиме штири катеґорїї людей. При дорозі – слухають поверьхово, недбало, слово не оставать в них, бо приходить діавол і краде тото слово, жебы не увірили і не были спасены. Слово не проникне на глубину, такой ся тратить зо сердця і мысли. На камяністй землі – суть тоты, што слухають і такой го з радостьов принимають, но не мають коріня, оставають на поверьху. Вірять лем на час. Кедь тото слово выжадує намаганя, жертву, одріканя, одпадують. До терня – суть тоты, котры так само выслухають слово і принимають го, но старости жывота, богатсва і роскошы тото слово задавлюють і оно оставать без плоду. І тоты, што суть добров земльов з добым і чістым сердцьом слухають слово, сохраняють го і ппиношають плод в терпезливости.

Ісус закончує тот образный приклад словами: Хто мать уха, най слухать. Не говорить о ухах як орґані тіла. Але о духовнім слуху, або духовнім зраку, котрым чоловік чує і видить не лем тото вонкашнє, але чує слова Духа і видить тото внутрішнє. Так і мы просьме, жебы сьме мали тот внутрішній слух і зрак открытый на Боже слово, жебы быти тов плодоноснов земльов, котра у своїм часі принесе плоды спасіня. Слава Ісусу Хрісту!

В неділю, 10 новембра 2019 р., о 9.00 год. проґрам «Слово», котрый реалізує єромонах Маркіян ЧСВВ. Повторіня 10 новембра о 12.00 і 11 новембра о 2.00 год. за русиньскым часом.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА