«Слово» – 21-та неділя по Сошествії Святого Духа Неділю – образный приклад о розсівачови – неділя, 9.00 год.

Образный приклад, котрый Ісус Хрістос нам говорить на днешній день, нам указує з єдной стороны на розсівача, котрым є сам Сын чоловіка. Він пришов на тоту землю, жебы розсіяти своє слово – зерно.

Тов земльов суть людьскы душы. Но можеме видіти в днешнім слові, же предці тото слово не выкличе єднаку реакцію у вшыткых. У тых, што суть на краї дорогы – слухають слово, але такой приходить діявол і краде слово з людьсых душ. То суть тоты, што і послухають, але недбало без віры в тото слово, і такой забывають. Тоты, што суть камянистов земльов – і послухають і з радостьов приїмають слово. І чітають жывоты святых, даколи і зо слызами над геройством многых мучеників. Знають быти надхненыма за Боже слово. Но не є в них терпеливости. Як прийде даякый проблем, покушіня ці пронаслідованя, одпадають. Не мають стабіліты в собі за Боже слово. Тоты, што в них до терня пало – котры бы хотіли робити компромісы. І од Бога прияти, небо наслідити, но і ужывати собі того світа. Суть кламаны діяволом. Хотіли бы служыти Богу і мамоні. Помаленькы богатство, роскошы, людьска слава задавлюють слово і оставать без плоду. Тоты, што суть добров земльов – з добрым і чістым сердцьом послухають слово і приношають плоды.

Так видиме, же тото слово є добре. То, же не принесе у дакого плоды, не є винов слова, але той землі – душі, або людьской волі. Не обстоїть жадна выгварка звальованя вины на іншых ці може і на Господа Бога за свій неуспіх. Одповідьов є четверта катеґоріа землі – котра принесла плод. Прото будьме тов добров земльов, котра з уважностьов слухать, з радостьов приїмать слово, сохранять го і терпезливым аплікованьом до нашого жывота приношать плоды. Слава Ісусу Хрісту!