«Слово» – 21-та неділя по Сошествії Святого Духа – неділя, 9.00 год.

Образный приклад о сіячови нам указує, же Бог з любви приходить на тоту землю. Приходить оголосити своє зерно – то є своє слово. Но предці тото слово не принесло плоды у многых.

На край дорогы – там пало у тых, котры выслухали слово, але тым ся то скончіло. Слухали поверьхово без віры, без охоты прияти тото слово. Так приходить діавол і краде посіяне. На тверду камяністу землю – тых, што з радостьов послухали і пряли. Але вірили лем до часу. Як настане даяка проблема, переслідованя про тото слово – одходять. Не хотять стратити выгоды, котры мають, ани принести жертву ці терпіня про выслухане слово. До терня, далша катеґорія – они і выслухають слово, і приймуть, но роскоші, богатства, пожадливости, тото вшытко як терня росне і задавить слово в сердці чоловіка. До доброй землі – то суть люде, котры з добрым і чістым сердцьом выслухають тото слово і приношають плод в терпеливости.

З тото видно, же кедь то слово не принесло плод, не была проблема в тім зернятку – слові, але в землі – в людьскій душі, котра мала прияти тото слово. Господь пришов оголосити свою науку. Пророкы, котры говорили під надхненьом Святого Духа, голосили не свою науку, своє слово, але Боже слово. Хосновали выражіня: так говорить Господь.

Ісус говорить своє слово, то є свою науку. Пришов розсіяти добре зерно – слово спасіня. А коли то слово не принесе хосен – є проблема в землі, в душі чоловіка.

Прото і мы, коли слухаме або чітаме Боже слово, дайме собі тот вопрос: Яков земльов на приятя Божого слова є моя душа? До котрой катеґорії ся можу зарадити в правді? Дайме сі правдиву одповідь, бо Бог познать нашы сердця, і просьме Го , жебы нам дав благодать быти тов добров земльов. Быти тыма, котры з добрым і чістым сердцьом выслухають, приймуть і принесуть плоды. Слава Ісусу Хрісту!

В неділю, 14. новембра 2021 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 14. новембра о 12.00 год. і 15. новмембра о 2.00 год. за русиньскым часом.