Воскресіня Яіровой дівкы і выздравліня кровоточівой жены. Дві події днешнього євангелія, котры навязують на себе. Яір приходить за Ісусом просити здравя про свою дівочку, котра умерала. Ісус іде з ним а по дорозі ся одбывать інша подія.
Єдна жена, котра довгы рокы терпіла на кровотечіня і уж не мала надію на выздравліня, на лікарів выдала цілый маєток, а без хосну, но іде ку Ісусови з віров. Тайно ся го дотулять і такой є выздравлена. Но Ісус ся заставив і ся звідує, хто ся го дотулив. Жена ся боїть, тадь она была нечістов і вшыткого, чого ся дотулила, ставало нечістым. Она ся дотулила Ісуса. Тым могла на себе стягнути його гнів. Но і так сила віры перемогла тот страх. Она видячі, же ся не затаїть, передступує перед Ісуса і вшытко йому розповіла. Теперь чекать на його реакцію. Но Ісус ласкаво потішать і говорить: Тебе твоя віра сохранила, ідь в покою.
Тоты слова были потіхов і про Яіра. Міг собі повісти: Кедь она была в єднім моменті выздравлена, а терпіла многы рока, та і моя дівочка може быти выздравлена. Но праві втогды пришли з його дому і повіли, же то уж пізно, бо она уж умерла. Ісус видів тото розрушіня в його сердці, говорить: Не бій ся, лем вірь і буде здрава. Было то велике выпробованя віры про Яіра увірити і в такій сітуації. А Ісус іде а воскрешать його дівочку. А было так, як повів Ісус.
Так днешнє слово і нас веде по дорозі віры. В днешніх часах, кедь ся тратить віра в силу Божого слова, в святы Тайны, в Евхарістію. Наперек тому вшыткому маме вірити – посліднє слово буде мати Бог. Най приклад кровоточівой жены і Яіра посилнить і нашу віру. Слава Ісусу Хрісту!
В неділю, 22. новембра 2020 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 22. новембра о 12.00 год. і 23. новембра о 2.00 год. за русиньскым часом.
Коментарі