«Слово» – 24-та неділя по Сошествії Святого Духа – неділя, 9.00 год.

Днешнє слово Євангелія нам говорить о двох чудесных подіях. О воскресіню Яіровой дівкы і выздравліню жены хворой на кровотечіня. Обидві події говорять о потребі жывой віры.

Жена, котра довгы рокы терпіла на кровотечіня, дала цілый свій маєтой на лікарів, а не нашла помочі. Коли увиділа Ісуса, повіла собі: Кедь ся дотулю лем края його облечіня, буду здрава. Так і зробила. З віров ся дотулила і была выздравлена.

Но Ісус ся несподівано заставив, і ся звідує, хто ся го дотулив. Чом то не робив при іншых моментах? Петро говорить: Тадь народ тя тисне кажду хвілю. А предці Ісус ся не обернув, хто то быв. А теперь при тій жені, ся звідує: Хто ся мене дотулив? З мене вышла сила. Тота жена, знаючі, же ся не затаїть, передступила перед Ісуса і трясучі ся выповіла цілу правду. А Ісус їй повів: Не бій ся, твоя віра тя сохранила, ідь в покою. Бо она была у великім страху, што з ньов буде. А Ісус єй заспокоює: Не бій ся. Ідь в покою.

Ісус одкрывать тоту велику віру той жены, жебы і нам указати, же не маме лем притисковати ся коло Ісуса, але дотуляти ся зо жывов віров. І коли приступуєме ку Святому Причастю, маме мати жыву і тверду віру, горячу любов ку Хрістови, котрый ся нам давать. Тыж коли ся молиме, маме молити ся зо жывов віров, бо сьме перед тым, котрому є дана вшытка влада на небі і на землі.

Прото учме ся од той жены. Най і в нас резонують тоты слова: Кедь ся дотулю з віров. Жебы сьме могли чути слово Спасителя: Твоя віра, тя сохранила, ідь в покою. Слава Ісусу Хрісту!

В неділю, 5. децембра 2021 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 5. децембра о 12.00 год. і 6. децембра о 2.00 год. за русиньскым часом.