«Слово» – 24-та неділя по Сошествії Святого Духа – неділя, 9.00 год.

Днешнє слово нам указує на Хріста як на Воскресителя. Приходить за ним Яір – начальник сінаґоґы просити за свою дівочку, котра умерала. Ісус іде з ним до його дому. По дорозі го стрічать жена, котра джанадцять років терпіла на кровотечіня. Выдала цілый свій маєток на лікарів, а нич не помогло.

Коли чула о Хрістови, приходить, перетисне ся через народ, а ємненько ся дотулить края його облечіня. Повіла собі: коли так зроблю, буду здрава. А як так зробила, справды зачула на собі, же є выздравлена зо свойой хвороты. Думала теперь в тихостх ся вытратити, тадь нихто не буде знати. Но Ісус ся заставив. І повів: Хто ся мене дотулив?

Петро лоґічно зареаґовав на такый вопрос: Народ тя притискує. Та жена собі могла подумати: то є моя надія, жебы прияв поясніня од свойого ученика. Но Ісусови то не старчіло. Повів: дахто ся мене дотулив, я чув, як із мене вышла сила. Тогды тота жена з плачом приступила і розповіла перед вшткыма цілу правду. А чекала, што теперь з ньов буде. Тадь тайно украла здравя. Но Ісус повів: не бій ся, тебе выздравила твоя віра, ідь в покою.

Ісус одкрывать тоту жену перед вшыткыма на великый хосен: наперед самого Яіра, котрому праві повіли, же його люба дітинка умерла. Прото Ісус такой йому повів: не бій ся, лем вірь і буде здрава! Потім то повів про тот народ, бо Петро то выразив ясно: народ тя притискать. Но тота жена ся го дотулила з віров, зато была выздравлена.

Далше то говорить і ку нам: жебы коли приступаме ку Хрістови у святых тайнах – сповіді і Євхарістії, жебы сьме приступали зо жывов віров. Ісус іде до дому Яіра і воскрешать його дівочку. Указує, же є Владыка над жывотом і смертьов. Наперед воскрешать тоту жену, котра была про свою хвороту якбы мертвов ку новому жывоту, а потім і дівку Яіра приводить зо смерти ку жывоту як Владыка неба і землі.

Так він хоче быти і нашым Воскресительом ку новому жывоту. Приступайме ку Ньому зо жывов віров подобно той кровоточівой жены, жебы і мы сьме учули слова: не бій ся, твоя віра тя выздравила, ідь в покою! Слава Ісусу Хрісту!

В неділю, 19. новембра 2023 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 19. новембра 2023 р. о 12.00 год. і 20. новембра 2023 р. о 2.00 год. за русиньскым часом.