«Слово» – 27- ма неділя по Сошетствії Святого Духа – неділя, 9.00 год.

В днешнім євангелію Ісус говорить образный приклад о чоловікови, котрый приготовив велику гостину. Закликав многых. Послав рабів, жебы повіли закликаным: Вшытко є пригтовлено, прийдтьте! Но они ся зачали выгваряти: єден на своє поле, іншый на волы, далшый, же ся оженив. Втогды тот господарь говорить рабови, най приведе хромых, сліпых, калікы, бо нихто із закликаных не буде їсти із той вечері.

Тот образный приклад говорить о Божій любви ку чоловіку. Бог хоче спасіня каждого. Образ гостины є образом неба, блажености, вічного щастя. Бог кличе, но чоловік ся выгварять на земне діла. Они помаленькы цалком опанують розум чоловіка і уж не думать о вічности, о своїм спасіню.

Так было із днешнім святым Яковом Персянином. Быв хрістіаном, служыв на дворі царя Персії, котрый быв ідолопоклонником. Яков скрывав свою віру. Бояв ся утратити приязнь царя. І слава, богатство, поставліня го помаленькы привели до забытя на Бога, і він зачав приношати жертвы вєдно із царьом. То іщі веце розмножыло його богатства і приязнь царя. Но його жена і дівка написали му писмо, в котрым го напоминають, же кідь так остане, они одречуть ся од нього. Яков по перечітаню заплакав, бо сі усвідомив, же кідь земны найближшы ся одречуть од нього, што буде з ним, кідь сам Хрістос одрече ся од нього, на котрого він забыв і його зохабив. І горенько заплакав. Втогды донесли на нього, же є хрістіан. І він сміло признав ся ку тому і быв страшно мученый. Різали му помалы пальці на руках і ногах, і фалатковали його тіло. Аж по дакілько годинах му одрубали наконець голову. Но він радовав ся із тых мук і прияв мученицькый вінець.

Видиме якым небезпеченством є привязаность ку земному. Бог кличе і нас. Покля маме час, не робме выгварькы як тоты із днешнього євангелія. Але одповіджме на тото закликаня. Жыйме свою віру. Жебы сьме не мусили раз чути тоты страшны слова: Нихто із тых закликаных не буде їсти (не буде участный) мойого царсьства. Слава Ісусу Хрісту!

В неділю, 10. децембра 2017 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 10. децембра о 15.00, 20.00 год. і 11. децембра o 2.00 год. за русиньскым часом.

Фото: Мученицьтво св. Якова. Жрідло: Wikipedia.