«Слово» – 3-тя неділя Великого посту – неділя, 9.00 год.

Третя неділя постна называть ся і Недільов крестопклоннов. На утрені ся выношать святый Крест на тетрапод і цілый тыждень приходиме і оддаваме йому честь словами: Кресту Твоєму покланяємся, Владыко, і святоє Воскресеніє Твоє славим.

Дайме собі вопрос: Чом в середині поста ся выкладать святый Крест? Посмотьме трохы до історії выбраного народа. Коли выбраный народ выходив із Еґіпта по довгім часі рабства, надходили різны проблемы і перешкоджіня, котры могли і много раз ослабльовали їх віру. Што їх тримало, то обіцянка обіцяной землі, де прямовали. Мали перед собов тоту землю, перейдеме через пустыні, а чекать нас красна земля, котру Господь нам приготовив. Ай кедь їм силы а тыж віра слабла, тота обіцянка їм додавала силы.

Так і нам свята Церьков в середині поста, коли береме його важні, нашы силы ся уменшують строгостьов поста, указує перед нас святый Крест. Не як знак терпіня, болести, проклятя, але Крест як знак побіды. Смотрячі на нього уж видиме, же недалеко є Пасха. Недалеко є Воскресіня. Тото нам давать посилніня іти далше.

Але тыж указує на наше Воскресіня, котрого є земна Пасха передобразом. Крест нам давать посилу іти далше за Хрістом, знаючі , же перед нами є не обіцяна земля, але само небо. Радость а блаженость, што людьске око не виділо а ухо не чуло. Давать нам силу не смотрити на земны курты выгоды. Давать нам силу не ганьбити ся за Хріста перед тым світом, ани за Його слова.

Знаючі, же коли останеме вірны, чекать нас вічне блаженьство. Але коли ся будеме ганьбити, жебы не стратити даякы выгоды на тім світі а може і земный жывот в часі пронаслідованя, тогды як Господь прийде у славі ся буде ганьбити за нас. А то бы про нас значіло вічну ганьбу.

Зато смотрячі на Крест почас того тыждня, посилниме ся ним до далшого часу посту і нашого земного путованю ку небесній Пасхі. Слава Ісусу Хрісту!

В неділю, 19. марца 2023 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 19. марца 2023 р. о 12.00 год. і 20. марца 2023 р. о 2.00 год. за русиньскым часом.