«Слово» – 4-та неділя Великого посту – неділя, 9.00 год.

Перешов уж четевртый тыждень Святой Штиридсятніці. Помаленькы ся приближуєме ку закончіню. І перед нами є вопрос: Як сьме выхосновали тоты штири тыждні? А тыж і вопрос: Як выхосновати іщі ліпше тот час перед нами?

Свята Церьков нам ку тому помагать через літурґічны тексты, через Боже слово Старого і Нового завіта. І днешню неділю нам ставить перед нас свій дар – Боже слово, котре є нам на потіху, підкріпліня і напомянутя.

Ісус Хрістос сходить зо своїма трьома апостолами: Петром, Яковом і Йоаном із горы Тавор. Долов одбывать ся штось незвычайне. Спрічка меджі учениками і жыдами. Тогды приступив ку Ісусови отець дітины, котру мукарив нечістый дух. Тот отець зачінать свою бісіду обвиньованьом Ісусовых учеників а і самого Ісуса. Тот отець повів, юривів єм го ку твоїм ученикам, а не могли го выгнати. Ісус на тото, о, чуджоложне і розпустне поколіня, доколи іщі буду з вами?

Даме собі вопрос. Чом Ісус реаґує так твердо? Отець того хлопця говорить, як прийде нов Місяця, метать го до огня і воды, жебы го загубив. Но кедь можеш, помож нам. Ісус йому одповів. кедь можеш, вшытко є можне, хто вірить. Отець ся высловив, же в часі нову Місяця зажывать тот хлопець тяжкы біды. Но не Місяць, як Боже сотворіня, быв на причіні, але діавол, котрый ся сховав за Місяць, жебы обвиньовати Бога і поставити чоловіка протів Нього.

Діавол хоче, жебы чоловік увірив, но не Богу а його слову, але жебы увірив, же Місяць або звізды мають міць над людми придільовати їм планы або добры дні. А так не лем тым людям, котры Його слухали тогды адресує Ісус тоты тверды слова, але много раз і нам. Они іщі не мали скушеность Воскресіня, перед нами є море свідків.

А так може зачінаме молитвов, оддаваме Господу Богу цілый день, кажду сітуацію. А потім увидиме в новинках гороскоп, а діавол нам підшепне, прочітай ці день буде щастливый і нещастливый! А мы так легко слухаме злого і віриме в силу зла, намісто того, жебы вірити в силу добра.

Тото нам треба собі усвідомляти і в постнім часі, коли намагаме ся іти на глубину. Жебы по молитвах, пості, духовных чітанях Божого слова а потім обернувши ся ку гороскопам, лічітелям і чародіям, а од них глядуючі поміч в здравю, пінязях, карьєрі жывота, не утратити плоды поста, а не учути слова: О, вы чуджоложе і зопсуте поколіня.

Прото з отцьом той дітины і мы закличме, покы маме час: Вірю, Господи, помож мойому невірству. Слава Ісусу Хрісту!

В неділю, 14. апріля 2024 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 14. апріля 2024 р. о 12.00 год. і 15. апріля 2024 р. о 2.00 год. за русиньскым часом.