«Слово» – 5-та неділя по Сошествії Святого Духа – неділя, 9.00 год.

Ісус Хрістос приходить зо своїма учениками до Ґерсиньского краю. Там, як вышов із лодькы, вышло оперед нього двоє людей, котры были опанованы нечістыма духами. Іщі лем збачіли Ісуса, кричать: што тобі до нас, Ісусе, Сыну Найвшысшого Бога, ты єсь пришов, жебы нас мучіти перед часом?

Ісус выганять нечістых духів із тых людей, а приходить і цілиый народ з міста, а просять Ісуса одыйти із їх краю. А Ісус одышов.

Євангеліста Мафтей іщі перед тым, як там Ісус пришов, говорить, же тоты люде, або демоны, котры їх опановали, были барз розъїджены, же люде бояли ся іти тов дорогов, де ся они находили. А при Хрістови суть кроткыма, кричать, што тобі до нас! А ты пришов перед часом нас мучіти!

Справды не є нич общого меджі Хрістом а демонами. Ісус пришов марновати діла діавола, ослободжовати людей спід його влады. А то, же діаволы кричать: ти пришов нас мучіти – ту видиме, же діавол добрі знать, же його очекує мука на страшнім суді. Но хоче тоту правду затемнити. Або нагваряти людям, же не є діавола, не є пекла, же не буде жадных вічных мук, ани ниякого суду. А коли чоловік прийме тото до свойой душы, то што йому сперать жебы жыв лем про тот світ, про тоту землю, жебы собі не одоперав ниякой потіхы, ниякой роскоші, жебы не смотрив на никого, лем на своє добро, жебы не крав, не убивав, жебы не одавав ся каждому гріху?

А тото хоче діавол досягнути, бо тогды ставать ся чоловік його сообщником і у вічных муках. Так як то Ісус говорить в слові о страшнім суді: Ідьте од мене прокляты до огня вічного, котрый є приготовленый про діавола і його ангелів. Но діавол говорить о муках і теперь, што то значіть. Приход Хріста і його слова выказаня злого духа суть про діавола муков, бо Хрістос йому сперать робити зло.

Про діавола є не робити зло – пережывати муку. Діавол простиь доволити йому іти до стада свинь. А Ісус доволює, жебы указати, же діавол хоче робити лем зло, і ту робить зло, же ціле стадо свинь ся потопило у воді.

Пастыре поутікали, як тото виділи, і росповіли жытелям міста, што ся стало. Ціле місто вышло оперед нього і просили, жебы одышов од них. Намісто того, жебы ся радовали з выздравліня тых людей. Они смотрять на то, же Хрістос їм приніс шкоду, стратили свині. Бо про них были свині важнішы як Хрістос. Бо смотрили на матеіалне. Не виділи ани чоловіка через затемніня матеріалныма предметами. І бояли ся прияти Хріста, жебы не стратили іщі веце. А Ісус одышов з їх краю.

Там, де є свиня на першім місці, Хрістос не мать місця, одходить. Велике поучіня і про нас, дорогы радіослухачі, якы суть нашы цінности. Не заберать і у нас свиня, і тото што репрезентує перше місце, як у тых жытелів того краю?

В неділю, 5. юла 2026 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 5. юла 2026 р. о 12.00 год. і 6. юла 2026 р. о 2.00 год. за русиньскым часом.