Ісус Хрістос приходить зо своїма учениками до ґерґесиньского краю. Там його стритили двоме люди, котры были опанованы нечістыма духами. Каждый бояв ся іти по тій дорозі, бо они были барс розъїджены.
Но, коли стрітили Ісуса, тоты демоны, котры наганяли страх, нараз перед ним суть кроткы. Чом? Бо перед собов видять Владыку Бога і свого Судцю. І так кричать теперь они зо страху перед ним. Што тя до нас Ісусе, Сыне Божый, ты пришов ту нас мучіти скорше, як в даный час – то є в час Страшного суду. Ісус їм уж наказав выйти із тых людей. А про злого духа послухати Божу волю є найтажшов муков. Але як сотворіня мусить ся повиновати. І так зый дух нич не може робити без Божого допущіня ці дозволіня. Так і теперь просять іти до стада свинь і Ісус їм доволив, жебы указати, яка злобность была в тых демонах. Ціле стадо верьгло ся долов і погыбло у воді. Пастырі то розповіли, і ціле місто пришло ку Ісусови і просили го, жебы одышов із їх края. І Ісус сів до лодькы і одышов.
Яке поучіня про нас? Там де є Хрістос, злый нич не може. Як не было Хріста в тім краю, злый дух быв смілый. В притомности Хріста кроткым. Ісус пришов ослободити нас од злобы діавола. Даровати слободу, но решпектує слободну волю.
Кедь повіме Богу – зістань з нами – він зістане і наповнить своїм покойом, одпущіньом. Но як через гріх, роскошы, привязаности ку земному повіме не так словами як нашыма ділами – ідь од нас – Ісус решпектує слободну волю. Но якы будуть наслідкы? Тото нам указує днешнє слово перед приходом Хріста до того краю. Слава Ісусу Хрісту!
В неділю, 12. юла 2020 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 12. юла о 12.00 год. і 13. юла о 2.00 год. за русиньскым часом.
ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА
Коментарі