Євангеліє 5-той неділі Великого посту нам указує на Ісуса, котрый іде до Єрусалима прияти мукы. По дорозі говорить своїм ученикам, што го там чекать. Выкладать їм подробно о своїх муках і смерти.
Двоє із учеників – Яков і Йоан, в тім часі роздумують, як здобыти высшы поставліня перед остатніма учениками. Хотять, жебы їм Ісус выповнив просьбу быти в його царьстві, єдному по правій і другому по лівій стороні. Їх розуміня Хрістового царьства было земным. Ісус їм говорить о чаші і крещіню. Но они говорять, же можуть тыж пити Хрістову чашу і быти покрещены тым крещіньом. Тото їм Ісус обіцять, но дати сидіти по правій ці лівій стороні односить ку тым, про котрых є тото приготовлене.
Но і остатні мукы не заоставали в думках на перше місце меджі апостлами. Кедь чули о тім, што просять Яков і Йоан, мерзили ся на них. Грозить розпад кругу апостолів. Прото Ісус, видячі тото небеспеченство, говорить їм, же владарі того світа хоснують свою міць над народами. Но він говорить, же хто хоче быти першый, най буде каждому рабом.
Така основна думка, котра ся тягне днешнім словом, є опрос першости. Там, де є і добре наміріня, но як ся закраде тота страсть мати перше місце, вшытко ся розпадать. Так ся розрушує кажде сполоченство, общество. Думка на першенство вшытко ничіть.
Но Ісус говорить, же хто прягне по першости, може так робити – быти першым в служіню, в любви, себежертві. Кедь будеме і мы так поступати, выповниме Хрістовы слова. Він сам давать приклад до наслідованя: Бо і Він не пришов, жебы йому служыли, але пришов послужыти і дати свій жывот за нас. Слава Ісусу Хрісту!
В неділю, 5. апріля 2020 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 5. апріля о 12.00 год. і 6. апріля о 2.00 год. за русиньскым часом.
ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА
Коментарі