«Слово» – 6-та неділя по Сошествії Святого Духа – неділя, 9.00 год.

Ісус Хрістос по ослободжіню од демоньскхо рабства двох людей в ґерґесиньскім краю пришов до Капернаума. Там ся посходило много народа, єднак жебы чути Його слово і дати ся выздравляти з різных хворот і траплінь.

Тогды четверо мужів принесли невладного а хотіли дістати ся ку Ісусови, але про многый народ, котрый ся тиснув коло дверей, то не могли зробити. Но они глядають іншый способ. Вышли на стріху а пробивши повалу стустили невладного прямо перед Ісуса. Ісус видячі їх віру предці не выздравив тілесно того чоловіка, але робить дашто важніше. Наперед выздравив його душу словами: Одпущають ся ті твої гріхы!

А коли може тоты, што принесли того невладного чудовали ся, а окреме фарізеї а учітелі закона, котры такой одсудили Ісуса у своїх сердцях, Ісус познавши їх внутро повів їм, чом так плано роздумуєте у своїх сердцях? Та што є легше повісти, одпущають ся ті твої гріхы або встань, возьмий свою постіл а ідь. А як доказ свого божества, а же мать на землі владу одпущати гріхы, повів йому, встань, возьмий свою постіль а ідь. А хворый так зробив, такой быв выздравленый.

Ісус Хрістос нам днешньов подійов указує на важность дбаня о свою безсмертну душу. Він видів де была причіна той невладности. Она была в гріху. Так наперед выздравлять душу, одстранює тоту головну причіну, а так давать і тілу зціліня.

Бо якый бы быв хосен, коли бы было здраве тіло, а душа бы была в рабстві гріха? І мы часто чуєме слова або і высловлюєме: лем най буде здравічко… А притім забываме, же найважніше є здравя нашой безсмертной душы. Бо тілесна хворота смертьов переставать і кажде трапліня, хоць як оно тяжке. Але кедь душа одыйде одтыль в рабстві гріха, тогды тото рабство перебывать навікы!

Ісус пришов на землю ослободити з рабства гріха і подати правдиву слободу і правдиву радость. То є тогды, кедь є душа очіщена од гріхів, коли зажывать правдиву радость з покоя з Богом. Ісус і нас позывать. І нам хоче дати свій покій, свою радость а і нам повісти: Не бій ся, одпущають ся ті твої гріхы. Слава Ісусу Хрісту!

В неділю, 16. юла 2023 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 16. юла 2023 р. о 12.00 год. і 17. юла 2023 р. о 2.00 год. за русиньскым часом.