«Слово» – 7-ма неділя по Сошествії Святого Духа – неділя, 9.00 год.

Ісус Хрістос робить дві чудесны діла. Выздравлять двох сліпых, а тыж чоловіка, котрый быв німый, і мав в собі демона. Сліпы самы, коли зачули близкость Хріста, котрый переходив коло них, кричать.

І давають ся привести до дому, де быв Ісус і просять вздравліня. Ісус ся дотулив їх очей і ся звідує: Вірите, же можу тото зробити? А они: Гей, Господи, віриме. Нашто їм одповів: Най буде так, як вірите. І їх очі ся отворили а они прославляли Бога.

Они іщі перед тым, як были выздравлены тілесно, были выздравлены на душі. Они увиділи очами душі, же Месія, Спаситель є ту. А Ісус одкрывать тоту їх віру перед іншыма своїм вопросом: Вірите? А же справды мали они віру ся указало на Ісусовій одповіді: Най буде подля вашой віры. А они провиділи.

Они справды вірили. Ісус давать тот вопрос і нам. Кедь наша душа находить в сліпоті гріха, страстей, привязаности ку тому земному. Кедь діавол скрывать перед ньов погляд ку вічности, жебы жыла лем про земне, про роскошы тіла, жалудка, про пінязі, пожадливости розмаїтой сорты, славу, поставліня, карьєру а далшы діла темноты, котры чоловіка одводять од Бога. Кедь душа зачує близкость Ісуса через свою совість – прягне по выздравліню душі. А ту ся Ісус звідує, віриш тому?

Ісус нас чекать в тайні покаяня а кладе нам тот вопрос: Віриш, же я можу одпустити тобі гріхы? Дати тобі новый зачаток? Кілько раз бы сьме хотіли вернути час, жебы сьме могли іщі раз повторити даяку сітуацію, но то не можеме зробити. А предці нам Ісус говорить, я то можу зробити. Я можу вшытко змазати а дати ті новый зачаток.

Учме ся од тых сліпых той жывой віры, жебы сьме могли од сердця повісти: І я вірю, Господи, же ты можеш тото зробити. Слава Ісусу Хрісту!

В неділю, 8. авґуста 2021 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 8. авґуста о 12.00 год. і 9. авґуста о 2.00 год. за русиньскым часом.