Голосник

«Слово» – 7-та неділя по Сошествії Святого Духа – неділя, 9.00 год.

Днешнє слово євангелія говорить о выздравліню двох сліпых, котры ішли за Ісусом а кричали: Сыну Давіда, помилуй нас! Ісус ся їх звідує на їх віру, ці вірять, же він тото може зробити і они одповідають: Віриме.

Они не повіли лем так, але справды в їх сердцях была тота жыва віра в Хріста. А прото, жебы тоту віру выявити і про другых, і про нас, Ісус їм говорить: Най буде так, як вірите. А на доказ того, же они увірили, такой ся їм отворили очі і они провиділи. А Ісус їм не доволює, жебы о тім бісідовали. Но они його прославляють по цілім краю.

Ісус не хоче славу од людей а учіть і нас, кедь зробиме даяке добре діло, жебы оддавати славу Богу.

Друге выздравліня днєшнього слова є о німім чоловікови, котрый мав у собі демона. Ісус выгнав демона, а німый прорік. Не говорить, най ся ті розвяже язык, але одстранив причіну, котра не довольовала говорити. Духовным значіньом не довольовала прославляти Бога. Аж як быв демон выгнаный, тот чоловік міг прославляти Бога. Ісус потім ходив по селах і містах – нелем там, де было много народа, але і по селах. Бо Він хоче спасіня каждого, каждой душы.

Прото його просьме, жебы і нам отворив духовны очі, жебы правдиво видіти, і даровав своє одпущіня, жебы мочі правдиво говорити, то є правдиво прославляти Бога своїма устами і своїм добрым хрістіаньскым жывотом. Слава Ісусу Хрісту!

В неділю, 26. юла 2020 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 26. юла о 12.00 год. і 27. юла о 2.00 год. за русиньскым часом.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

Шеруй.

О авторі

Avatar

Коментарі