«Слово» – 8-ма неділя по Сошествії Святого Духа – неділя, 9.00 год.

Ісус Хрістос взяв своїх учеників на пусте місце трохы одпочати. Народ додумав ся, де они одплавали на лодьці, та спередили їх по сухій землі. Коли выступили з лодькы, находило ся там множество народа. Ісус посановав їх.

Выздравляв їх хворых а цілый день їх научав. Коли наставав вечур, ученикы Йому говорять, пропусть уж народ, най собі ідуть купити їдла. Але Ісус їм повів: Не треба їм одходити, вы їм дайте їсти. Они зачудовано одповіли: Тадь маме ту лем пять хлібів і дві рыбы. А Ісус їм повів: Принесьте мі їх ту. Народу наказав сісти до травы а поблагословив хлібы і давав ученикам а ученикы давали народу. А вшыткы їли а понаїдали ся, а іщі позберали дванадцять кошів окрайців, што зістали.

Тото слово нам говорить нелем о чудеснім ділі розмножіня хліба. Але хоче нас научіти. Як Господь хоче нас научати робити добро нашым ближнім. А притім нас учіть: што вы зробили єдному з маленькых, мі сьте то зробили. То значіть, добре діло зроблене ближньому односить ку собі, а обіцять за то велику одміну. Вічне Царьство.

А притім вшытко належыть Богу. Мы собі нич не принесли, а нич не однесеме. А так што належыть йому, Він тото діло зроблене ближньому приїмать як зроблене з нашого а зато обіцять одміну.

Ту видиме велику Божу любов ку нам. Од нас хоче лем єдно. То мало, што маме, дати Йому. Так як то зробили ученикы, одрекли ся вшыткого, а не были збаламучены. Але насытили ся многы і они самы.

Так і мы робме добро нашым ближнім, покы маме час земного жывота. Ці словом, ці ділом, ці матеріално. Жебы сьме могли учути од вічного Судцю: Што вы зробили єдному з тых маленькых – мі сьте то зробили. Слава Ісусу Хрісту!

В неділю, 30. юла 2023 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 30. юла 2023 р. о 12.00 год. і 31. юла 2023 р. о 2.00 год. за русиньскым часом.