«Слово» – 9-та неділя по Сошествії Святого Духа – неділя, 9.00 год.

Днешня неділя нам говорить о важности стояти твердо у вірі в Хрістове слово. Ученикы плавлять ся на лодьці і вітор дув проти ньой. Волны піднимають ся, ученикы мусять намагатися. А Ісус в тім часі не быв із нима, быв по розмножіню хлібів на горі. А як видів як они намагають ся, приходить ку ним, но іншым способом, іде по воді як по твердій землі.

Ученикы як збачіли, же хтось іде по воді, думали собі, же то злый дух, котрый їх хоче змарновати. Они сі усвідомлюють, же суть самы, Ісуса з нима не є. І од страху закричали. Но Ісус такой ся ку ним озвав: Не бійте ся, то єм Я, не бійте ся. Петро повів: Господи, та кедь то ты, дай мі прийти ку тобі по воді.

Кедь ся задумаме над прошіньом Петра, просить о то, што не є звычайно людьскій природі, жебы чоловік ходив по волнах. Но тото слово є адресоване нам. Є адресоване до нашого жывота. Ісус говорить Петрови: Подь. А Петро выступив із лодькы, і крачав по воді. Покы мав перед собов Хріста і вірив його слову: Подь, Я ті давам тоту способность іти по воді. Она буде про тя твердов земльов.

А так ся і стало. Вода была про Петра твердов земльов. Но великый вітор і волны якбы своїма голосами ся старали заглушыти тот голос Хріста. Якбы йому говорили: То не можеш крачати по воді. А Петро заслухав ся і почав топити ся. І тогды закричав: Господи, захрань, рятуй ня! А Ісус розтягнув руку і піднимать Петра а говорить йому: маловірный, чом єсь быв двоякой мысли? Чом єсь перестав смотрити лем на мене а вірити мойому слову? Єсь видів, коли єсь свій погляд напрямив на мене і моє слово было в твоїй мысли, ішов єсь по воді. Но, коли єсь ся заслухав до іншого голосу, видів єсь што ся з тобов діло?

Дорогы радіослухачі, тото слово говорить ку нам. І мы находиме ся в тых волнах і вітрі того жывота а ту звучіть слово Хріста: Я єм з вами по вшыткы дні свого жывота. На іншім місці нам говорить: У світі будете мати трапліня, но довіряйте, Я єм переміг світ. Не смоть на то, што діє ся коло тебе, якы волны, вітры, голосы, сам діавол напрямують ся і старають заколысати нашу віру, жебы стягнути долов. А коли чоловік заслухать ся до тых голосів і перестане мати Хріста перед очами, легко ся може зачати топити і ся потопити в морі погыбелі.

Посмотьме на єден приклад в Старім завіті: Царь Йоас, о котрім нам говорить 2. книга Кронік в 24. главі, быв царьом благочестивым. Выхованым священиком Йоадайом і його женов Йосавет. Мав сім років, коли став ся царьом і понад 40 років царьовав. Покы жыв священик Йодай, Йоас ішов по Божій дорозі, в волнах і вітрах ідопоклонства, котры старали ся одвести людей од Бога. Йоас робив обновліня і храму, котрый быв в часі опередніх царів занедбаниый, бо ся оддавали ідолослужіню. А Господь быв із Йоасом і йому благословив у вшыткім, што робив, бо все мав Бога перед очами.

Но коли умер Йодай, мав стотридцять років, тогды пришли начальникы юдейскы і зачали пересвідчовати царя: не можеш быти так засліпленый лем віров в єдиного Бога, діскріміновати іншы култы. А так своїма словами звели з правой дорогы царя Йоаса. Опустив Церьков жывого Бога і кланяв ся поганьскым ідолам. Коли Господь посылать пророків, головно выступує сын Йодая Азарія, котрый наповненый Святым Духом сміло выступив і повів: Опустили сьте Жывого Бога, не будете мати успіх. Охабили сьте Бога і Бог охабить вас.

Но намісто покаяня царь і начальникы дали Азарію каміньовати. А царя чекав смутный конець. Перестав мати перед очами Бога, заслухав ся до іншого голосу а потопив ся в морі ідолопоклонства.

Подобно і мы сьме в подобній сітуації. Ці і нам тот світ не говорить: Не можете слухати лем Боже слова, не можете мати такый діскріміначный погляд. Не можете видіти в тім гріх. Сьме свідками вывышованя гріха, або його неґованя. Пересвідчованя, же вшытко є доволене. Же чоловік ся не мать дати ничім обмеджовати. Тот світ, діавол, медії якбы тыма волнами гучать до нашой мыслі тоты слова.

Зато нас тото слово напоминатть і потішать: Не смотьте на вітор ани волны, але упрямте свій погляд на Хріста і на Його слово, і тогды нас тоты голосы не збаламутять і ся не потопиме. Слава Ісусу Хрісту!

В неділю, 2. авґуста 2026 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 2. авґуста 2026 р. о 12.00 год. і 3. авґуста 2026 р. о 2.00 год. за русиньскым часом.