По часі приготовліня святым постом пережываме днешній день, тот радостный Праздник світлого Воскресіня Хрістового або Хрістовой Пасхы. Праздник Пасхы быв передоображений уж в Старім Завіті, кідь выбраный народ під веджіньом Мойсея выходить з рабства Еґіпта а пізніше через Ісуса Навина входить до обіцяной землі. Но Хрістос нас освободжує од того вонкашнього рабства, не воваджать до той часной обіцяной землі, але як співаме в нашых Богослужінях на днешній день, од смерти ку жывоту, од землі ку небу. Хрістос своїм воскресіньом отворять нам двері до неба. Дарує нам свободу од гріха, од смерти од діявола. Правда, смерть – тота фізічна, іщі якбы пановала над чоловіком і далше, але она уж не є смертьов лем заснутьом. І гріх, злоба, діявол – тыж видить ся якбы пановали над світом і по воскресінню Хрістовім а тоты, што хотять жыти подля євангелія, што хотять жыти з Хрістом, суть высміваны, понижованы, пронаслідованы, суть в ненависти того світа і мучены і убиваны, але тото вшытко уж лем до часу. До часу другого Хрістового приходу, кідь буде смерть цалком знищена, кідь нашы тіла будуть воскресены і не будуть уж такы як суть теперь, што підлігають обмеджіням часу, простору, нахылны ку тепріню, ку хвороті, але будуть прославлены. А так тепріня, болiсть, тяжкости ці проблемы нашого жывота доставають у світлі Воскресіня нову дімензію. Стають ся легкыма, кідь смотриме на них очами воскресіння. Жычу Вам вшыткым благословены, радостны свята Воскресіня Хрістового. Хрістос воскрес!
В Великден, 16. апріля/квітня 2017 р., о 9.00 год. проґрам «Слово», котрый реалізує єромонах Маркіян ЧСВВ. Повторіня 16. апріля/квітня о 12.00, 15.00, 20.00 год. і 17. апріля/квітня о 2.00 год. за русиньскым часом.
ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА
Фото: фреска Сошествіє во ад, Церьков монастыря Хора. Жрідло: Wikipedia.
Коментарі