«Слово» – Квітна неділя – неділя, 9.00 год.

Ісус Хрістос перед торжественым входом до Єрусалима робить іщі єдно чудесне діло. Воскресіня Лазаря, котрый быв штири дні в гробі.

І кедь знать о тім, же Лазарь є хворый, як кебы чекав на його смерть. А аж кедь Лазарь умер, говорить своїм ученикам, же їм треба іти до Юдеї розбудити Лазаря. Коли там пришов і дав наказ одвалити камінь, своїм голосом, котрый зазбучав до тремных місць аду, кличе Лазаря. Лазарь, подь вон. А Лазарь вышов, офачованый на руках і ногах.

Тым воскресіньом уж указує і на своє воскресіня, і на воскресіня Адама. Коли Адам согрішыв, Бог його кличе по імені. Тым указує, же Його любов ку чоловіку ся його паджіньом не перервала. Теперь тым голосом, котрый дошов аж ку Адамови, йому давать знати. Уж не довго, а прийду ку тобі, жебы тя выслободити із тых вязніць аду.

Тота подія притягла велике множество Жыдів, котры пришли до Єрусалима на праздник. Хотіли видіти, хто є Ісус. Дакотры може о нім чули першый раз. Бо приходили Жыде із многых народів на праздник Пасхы. Але тыж хотіли видіти Ісуса.

А Коли Ісус сідать на ослятко (што є сімболом поганьскых народів, бо осліця значіла жыдівскый народ, котрый ся все бунтовав проти Бога), Ісус указує, же приношать спасіня і поганам. Народы го прославляють співом Осана во вышніх. Вшыткы очекують, а то і апостолы, же Ісус прийде до Єрусалима як великый силный Царь, котрый выжене окупацію Рима, а буде царьовати. А так у великій натхнености, вшыткы кричать: Благословленый, хто приходить в імень Господа.

Но Ісус мав перед очами інше Царьство. Тота прослава, котру Йому давали при Його приході до Єрусалима, насправды значіла прославу Його побіды над гріхом, і смертьов, і діаволом. Но народ тото не видів. Ісус ай тым указав, яка поминаюча скоро є людьска слава. Тадь тот самый народ, котрый теперь прославлять Хріста, як Царя Ізраіля, буде о три дні кричати: На крест, не маме царя, лем цісаря.

Прославляйме і мы нашого Небесного Царя, котрый мать іншы пріціпы як земны царі. Він приходить в покорі, любви, служіню, жертвованю себе за многых. Не дайме ся поїмати поверьхностьов, зимныма думками. Бо втогды легко можеме зыйти до думаня тых людей, котры спроваджали Ісуса на дорозі до Єрусалима. Коли іде подля нашого плану – Осана, а як іде іншак, як мы сі наплануєме – втогды – на крест.

В неділю, 9. апріля 2023 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 9. апріля 2023 р. о 12.00 год. і 10. апріля 2023 р. о 2.00 год. за русиньскым часом.