«Слово» на Крестопоклонну неділю – неділя, 9.00 год.

Днешня третя неділя Святой штиридсятніці ся называть Неділя крестопоклонна. На утрені той неділі выкладать ся св. Крест. Крест, котрый нас мать посилнити в нашім постнім труді на дорозі ку Пасхі. Євангеліє нам говорть, хто хоче іти за Хрістом, быти його ученик, його наслідовати. суть ку тому три условії. Одшмарити себе, свою фалошну представу о собі, свого старого чоловіка, котрый є навязаный на рабство, на служіня не Богу, але Божому противникови через неслухняность Божому слову і його заповідям. Далшым є взяти крест. Кідь приймеме тото позваня іти за Хрістом, є потрібно приймати на тій дорозі вшытко тото, што нас стрітне, тажкости, проблемы, пронаслідованя, терпіня. А жебы сьме то могли зробити, треба смотрити на Хріста. Із любви ку ньому приношати тоту жертву. Кого любиме, про того ся легше жертвуєме. Кідь любиме Господа, його слово, кідь хочеме быти участниками його царьства, тогды смотриме лем на єдно, жебы набыти тот ціль несмотрячі на різны перешкоджіня, котры нас стрічають. І так смотрячі на крест, як на знак побіды, за котрым приходить воскресіня, тогды з векшов ревностьов, запеленостьов, будеме старати ся выхосновати не лем тот постный час на дорозі ку тій земній Пасхі, но і цілый наш жывот ку дорозі ку небесній Пасхі. Слава ІСХС!